[محمد العتيبي]

أسعد الله أوقاتكم بالخير والمسرات ..

أولا : نحمد الله تعالى على سلامة الشاعر القدير / عيضه بن معيوض الثبيتي . وصديقه .

أثر الحادث المروع الذي ألمّ بهم ، ونجوا بحمد الله وفضله .

ثانيا : أقدم لكم محاورة رائعه اجراها ثنائي رائع في حفلة خاصه لم يحضرها غيرهم من الشعراء ونجحت
هذه الحفله نجاحا يليق بهم وهم :

حبيّب العازمي @ زيد العضيله

وكان بداية الطرق مع زيد بن سلمي :

يا سلام الله سلام وحيلتي من دون حالي = والوفا نشفق عليه ونحفظه مثل الأمانه .
التجارب علمتنا درس من سود الليالي = مانشدنا مشية الحباي وشلون احبيانه .

حبيّب العازمي :

مرحبا وان كان لك حيله ترى لليل تالي = أطرح الخيّال فالميدان ولاّ أطرح حصانه .
الهبايب يالمطاري لو تصافق فالجبالي = الهبايب مقفيه والضلع باقي في مكانه .

زيد العضيله :

الاجابه ياحبيّب لا تغيّر عن سؤالي = أيمن الموضوع عانه وايسر الموضوع عانه.
العقيمه لو تعالج ماتجيب الها عيالي = والصدوق اليا هرج معروف صدقه من لسانه .

حبيّب العازمي :

كم سمعت من المشاكل فالجنوب وفالشمالي =والصحيح إن الكذوب نهايته يقطع لسانه .
وإن نسيت ذياب بن غانم وأبو زيد الهلالي = قالوا العتبان يازيد أجودي مانته تكانه .

زيد العضيله :

ودّي أعلّمك باسماء معقدة روس الحبالي = اقرصه باذنيه ولاّ نوشوه الخيزرانه .
مانسيت ولا جهلت وعارفٍ قدر الرجالي = إن حسبتوها لكاعه وإن حسبتوها لعانه .

حبيّب العازمي :

إنتبه للصف الأقصى واترك الصف الموالي = شرهة العقّال ماتحسب على اطفال الحضانه .
يامطير اللي من أول سلمكم فالسوق غالي = آخر الأيام صرتوا تعصرون البرتكانه .

زيد العضيله :

ماتواطا للضعافه لو خسرت أغلى حلالي = الحصان يشد سرجه والجمل يكرب بطانه .
أنت ماتجهل مطير وبيتهم يذري ضلالي = مير ياجيراننا العتبان فالدعوى خيانه .

حبيّب العازمي :

الرديّه خلها فوق الثرى تحت النعالي = الردي يعرف خوانه والوفي يعرف خوانه .

ارجوا أن أكون قد وفقت بالإرتقاء لذائقتكم .
وترقبوا الجزء الثاني من هذه الحفله أو المحاوره الحماسيه للشاعرين .

التوقيع

للتواصل عبر twitter تويتر al_bargawy@