قادح شرار :
مرحبا بالقريب ... ومرحبا بالبعيـد = والتراحيب أوزعها لكـل الضيـوف
يالسعيدي عسى فالوقت عيدك سعيد = فرحة العيد نظهرها من أجل الضعوف
فواز السعيدي :
البقـا يامرحـب فالفضـا بالقصيـد = لو انا ما يهيضني يكـود الصفـوف
وانت هات البشارة جعل ثوبك جديـد = قبل نتعب على وضع النقط والحروف
قادح شرار :
أنت لافي علينـا ودك إن تستفيـد = مير أنا والله الليلة لذكي خـروف
شوفتك يالسعيدي تعتبر يوم عيـد = والتعب في سواتك يا رفيق مخلوف
فواز السعيدي :
جاتني دعوة عتيبي وعلمـي وكيـد = مارفضت العزيمة بعد جات الظروف
الك مني هديـة لا لزمـت الهريـد = الهريد اهون من الشاه مافيه صـوف
قادح شرار :
مرحبا يالسعيدي ... مرحبا من جديـد = حيث قومك رجال العز قوم السيـوف
لا تداحم جبـال ... ولا تعانـد عنيـد = أنسدح تحت ظل البيت ... سو امعروف
فواز السعيدي :
ارسل اسمك علي وصورتك فالبريـد = وارفع عمامتك حتى تبيـن الكتـوف
بارك الله بطاستنـا وقـدر العصيـد = كيف يلحقك جوع وليش تقعد تحوف؟؟
قادح شرار :
أنت تلجـأ علينـا فالنهـار الشديـد = لا حصل وقت شدة ... ما نرد الهنوف
أدري إنك ضعيّف .. وأعتبرني رصيد = من جهتكم تراني شخص نفسي عيوف
فواز السعيدي :
ليش يدخلك مني وسط قلبك ضهيـد = والله اني نويت اعمل معاك امعروف
ابيض الشارب اللي ينحرف بالجريد = لايعرف الرياض ولا يدل الهفـوف
قادح شرار :
لا تظاهر بصحة .. جاتلك فالوريد = حملت شعيل عندك حوّلت للردوف
كل حداد ما يصعب عـلاه الحديـد = أنت يا شاعر ٍ يبدع بصوت الكفوف
فواز السعيدي :
المعاني خطيرة خل ساسـك جويـد = روح للعازمي يعطيك بعض الصنوف
انت يا صامل الزندين راسـك عنيـد = مار فيك الزعل والطربقة بالدفـوف
قادح شرار :
المعاني خطيره ... يـا ولـد لا تهيـد = روح للقارحي يكشف عليك ويشـوف
أنت يا راعي البندق ... ما تعرف تصيد = السوالف تعدي فوق راسك ...تطـوف
فواز السعيدي :
انصح الآدمي ويرد علمـي جحيـد = قلت عان الطريق وقال بكره خسوف
روح صاحب جواد وخاو عبد المجيد = قبل تنكب عتيبـة ماتفيـد الحسـوف
والله إنّا نفتقد معجب في بعض المواقف .
وأشكر جميع الأخوان اللي شرفونا .