يا اخوان قصيدة الشيخ تركي الي منها هالبيت
مرباعنا الطيري وطية نفوده =واصيح للغلبا بروس المشاريف
هذي قبل كون البديعة ولايقصد فيه طلب الفزعة من سبيع
هو موجه القصيدة بالاساس لسعد بن قطنان من سبيع فذكر بلاد ربعه ومدحهم ثم وجه القصيدة لبن قطنان يوم يقول
مرباعنا الطيري وطية نفوده =واصيح للغلبا بروس المشاريف
اهل بلاد موثقينن حدوده=واهل مهار يلعبن العجايف
ماحدة البرقا لشرقي نفوده=حامينها الغلبا بروس المشاريف
ياوصلن مني سعد ويش زوده=من واحد وصف من الحكي توصيف
ماجاب طهطام حصان يقوده=ولا مهرة تبري لجيش مناكيف
ويقصد بالشطر ( من واحد وصف من الحكي توصيف ) محمد بن هادي
لان سبيع كانت قبل نزول عتيبة تحارب قحطان وكان في هاك الوقت العداء على اشده بين سعد بن قطنان ومحمد بن هادي
وتركي بن حميد يبي يشوف هل سبيع حالفت قحطان بعد نزول عتيبة ولا بقوا على عدائهم له
لان بعد نزول عتيبة تحالفت قبايل كانت معادية لبعضهم وعلى سبيل المثال تحالف قبيلة مطير والدواسر مع عدوهم اللدود قحطان
وكان الرد من سبيع
ان حربنا تسعين عام حدوده=ومن بيننا خطلان الايدي مصاريف
الي انت تيتم ميتمينن جدوده=بشلف مضاربها حوال السراجيف
وعرف تركي ان سبيع لم تحالف قحطان وتبي تكون في الحياد بين القبيلة الي نزلت من الحجاز تبي تستوطن في نجد الي هي عتيبة والقبيلة الي حالفتها بعض القبايل بعد نزول عتيبة وهي قحطان
فقامت الحرب يوم البديعة وماشارك احد من خارج عتيبة لاسبيع ولاغيرهم
ومطير بقيادة ابن بصيص قالوا للشيخ تركي قبل المعركة حنا معك ضد ابن هادي لانه استولى على بلادهم قبل نزول عتيبة وكان مبيت النيه بالانسحاب من المعركة وفعلن قبل تبتدي الحرب انسحب ابن بصيص وربعه
وبعد منتهت المعركة بنصر عتيبة وقال تركي بن حميد بعد المعركة قصيده موجهها لسلطان بن ربيعان ( ابوتركي ) شيخ قبايل الروقة لانه ماحضر المعركة ويوضحله وش صار فالمعركة
اراكب اللي بقلهن قد تثنا = فج العضود مدمثات المحاصير
لاهن قعس ولاهن بدنا = ومتيهاتٍ في ليالي المخاضير
الصبح من وادي الرشا ينشرنا = من بيت ابو خالد زبون المقاصير
يلفن ابو تركي زبون المجنا = ريف الهشالا في ليال المعاسير
الشيخ مثلك ما نزل شعر عنا = وادنا عتيبه حايلٍ دونه النير
جانا الصعيري قال صولو وصلنا = صلنا نحسب انه على راي تدبير
اثر الصعيري فزعته ماج عنا = واقفن ظعونه عقب ماهن مناحير
وجينا على ركن الحريب ونزلنا = وصرنا دواوير وصارو دواوير
يا كبر زبر جموعهم يوم جنا = ارواحنا ترخص وهي للمقادير
بايماننا صوارمٍ يقطعنا = سقى القنيده من حقوق الشخاتير
ومن عقب هذا لا مطير وحنا = لا صلب جد ولا بهم نيه الخير
لكنهم يوم انجلا السو عنا = هذا طريح وذاك ذب المعابير
لي لابةٍ تشلع من السن سنا = ان كان بالغارات ولا الطوابير
ناسٍ اليا ركبو على القحص جنا = في منتهاه ننزح النمر والزير
ولا جاء طاري لسبيع في المعركة لانها اصلن ماشاركت لابواحد ولا بعشره