عقاب بن سقيان العتيبي
ياسلامي سلام من حسابي حسبته=وافي الناس احب اوفيه واحسب حسابه
ماشريت القصيد شرا ولاقد نهبته=شاعر من حموله والقبيله عتابه
معجب العتيبي
مرحبا مرحبا بعقاب من يوم شفته=شاعرٍ في محله ياهلا مرحبابه
كان ياعقاب بيت الله عرفته وطفته=عن كثير الدروب الزم دروب الصحابه
عقاب بن سقيان العتيبي
من يطيع الهقاوي يالعتيبي حرفته=اعرف الدرب كله وقفته وانقلابه
انت رجل سديد ومن ضربني ضربته=من تركني لحالي تاركه ويش ابابه
معجب العتيبي
دام هرجك بدا ياعقاب طبعك عرفته=خل صدرك يابن عمي شديد الرحابه
من صرفلي ريال جنيه(ن) احمر صرفته=سوق بيع وشرا مافيه سرق ونهابه
عقاب بن سقيان العتيبي
يابن عمي حكيم ومن رغبني رغبته=من بغى سوقنا الغالي بماله شرابه
الجمل فيه صبر ومن يعدل رقبته=وادري انك خصيم كل درب سرابه
معجب العتيبي
حق غيرك لنفسك ماخبرتك نسبته=واعتبرها مع اهل العلم علم وذرابه
الجمل للحمول الكايده ليش عبته=انشد اهل المعرفه من بعيد وقرابه
عقاب بن سقيان العتيبي
يالعتيبي يغيب ابليس عنا وجبته=والكتاب الكريم مصلي من قرابه
عفشك اللي نحزمه كيف رحت ونكبته=فيه احد ياجودي هاللون ينثر زهابه
معجب العتيبي
دربك اللي مشيته ليش ياعقاب عفته=ليش ياعقاب عفته عقب كلٍ درابه
ياعجايب عجايب وصفك اللي وصفته=لا لحقنا شكوك ولا لحقنا غرابه