علي فلاح العضياني
هلا مرحبا ترحيب واجب و تقدير=بابو تركي اللي غايبٍ من زماني
يا ناصر عسا ربّي يمسّيك بالخير=وابارك لك بحلول شهر رمضاني
ناصر المرشدي
غيابي مقادير وحضوري مقادير=يامال البقاء يا شاعر اهل المحاني
ماغير الرفيق اللي على البال ماغير=ليا غبت لو ساعة زمن مانساني
علي فلاح العضياني
قبل ينكتب يا صاحبي فيك تقرير=ما أبا أحصّلك في غير هذا المكاني
ترى لجنة التنظيم حطّت معايير=تمعّن مدى مضمون ( نصّ ) البياني
ناصر المرشدي
(تدور على الجنه وطحت بزمهرير)=عليك انطبق هالبيت يالمودماني
ياعلي العضياني عسى خير ياطير=قبل يوم وانته مع فلان الفلاني
علي فلاح العضياني
أدوّر ذهيبٍ ما لقوه المداوير=و عنه أنشد العربان قاصي و داني
و قبل أمس جتني عنه بعض التباشير=و شفته بعيني ثمّ جيته و جاني
ناصر المرشدي
اجل لاتشره يازبون المخاسير=ليا شفتني بين جبله وحلباني
ابا ورد الضامي على جمة البير=ياكم جم جيته واردِ ماكفاني
علي فلاح العضياني
بعد صرت من ضمن الرجال المشاهير=حضورك ضروري لا يروّعك هاني
ترى ما رسى فالبحر غير البوابير=تشقّ البحر حتّى تجي فالمواني
ناصر المرشدي
بعد صرت نجم وشجعوك الجماهير=علامك موسوس ياعلي ماتداني
مايجلى العماس الا الدلال المباهير=ليا بهرت بالهيل والزعفراني
علي فلاح العضياني
أنا صرت و انته يالعتيبي متى تصير=تغنّي مع الشاعر بخيت السناني
كذا والله إنّي فيك أدير التفاكير=لا تفتح على نفسك يا ناصر معاني
ناصر المرشدي
بعيد الهقاوي يدهن السير ويسير=وقريب الهقاوي هقوةِ بالساني
ترى فالشبك ماطاح غير العصافير=تبا تقضي الايام وانته تعاني
علي فلاح العضياني
ترى الوافي اللي ما يجي منه تقصير=لسانه فصيح و من طوال اليماني
تعيش الحرار معكّفات الدناقير=و لا تطرح من الصيد غير السماني
ناصر المرشدي
ميامين والا يالعتيبي مياسير=تقلب مدام ان الزمن قلباني
انا كنت ابا ناديك ياسالم الزير=وهالحين ابا ناديك مرمر زماني
علي فلاح العضياني
ما دام الشبب قسم الوجيه المسافير=أنا ابحمد الله يوم ربّي عطاني
تحلّم و حلمك ما له أيّات تفسير=و لا يتفق بالعرف شانك و شاني
ناصر المرشدي
مدام البلاوي مالها ايّات تبرير=انا بحمد الله خالقي مابلاني
ابا اضيّر الخلفه وتجفل من الضير=لكن مالها الا مطرق الخيزراني
علي فلاح العضياني
قويّ العزوم يصخّر الصعب تصخير=وضعيف الجهَد عشره تعوّد ثماني
لو إنّك يا ناصر ذقت درّ المصاغير=تغيّر مفاهيمك بفهوم ثاني