سلطان الحافي
ابتدا الطاروق يامعجب وكلن في مداره = وانتبه ياصاحبي للارض قوه جاذبيه
بينا الميدان والاول على رقم الصداره = شد حيلك يالعتيبي ثبت شداد المطيه
معجب العتيبي
كل طير يطير يالحافي ويرجع في دياره=لو تجاهلت السلام ولو تجاهلت التحيه
انتهى الموضوع والترتيب قد جانا قراره=صرت انا الاول وابا قدملك الثاني هديه
سلطان الحافي
اثر معجب ياعتيبه يونس بكبده حراره = في زمان العولمه مدري زمان الجاهليه
كان جيت المركز الاول نبا دفع استماره = لاتعجل والمنايا جايتك في مزهريه
معجب العتيبي
اشفق بقلبي ليا شفت الغشيم يشب ناره=خص لامن صار من ربعي وانا عندي حميه
المرور السري اللي واقفٍ جنب الاشاره=وده يحرر قسيمه مالقا ذنب وخطيه
سلطان الحافي
ثوبك اللي لابسه بالله من ركب زراره = ابلشك معنا ويمكن تلعنه كل ضحويه
سود الله شاربٍ ماقام ثم رد اعتباره = يوم راع التاليه لاشافنا تقصر يديه
معجب العتيبي
ثوب عز وثوب علم وثوب تعليم ووقاره=مايهم ان كان جبته غصب والا جا هديه
ماتضيع حقوقنا ونعيش في عز ونعاره=يوم بعض الناس هل الدمع في صبح وعشيه
سلطان الحافي
ما علي من العقارب دستها تحت الجحاره = ولا نبا منكم حصاه ولا نبا منكم عطيه
العلم مرفوع لاكن مستشكن في شعاره = الهوي داره يسار وصار مجهول الهويه
معجب العتيبي
الله اكبر ياجماعه شوفوا حروف العباره=صاحبي تحت الثرا يدخل ويذبحله بليه
لاتلف عيونك مع الريح وتصيبك عواره=دامك تراقب علمنا من نحيه في نحيه
سلطان الحافي
الله اكبر ياجماعه خاط للدعوى ستاره = مادرى انا نعرف النفس الفقيره والغنيه
الجمل لاناخ يا معجب يحول فوق زاره = لا تعجب كان قلنا معجب بعينه شويه
معجب العتيبي
يقتل المقتول ويعوّد يطالبني بثاره=الله اكبر ياجماعه نية الرجال نيه
كان تبغاها سوالف يالعتيبي واستثاره=يمكن الموضوع مايعجبك لاطوّل شويه
سلطان الحافي
امنية معجب ياتاجر مع هوامير التجاره = مار اعرفه راس ماله عنزتين وبربريه
الله اكبر من زماني كثرو اطفال الحجاره =واين نلقا الشيخ يالعتبان حلال القضيه
معجب العتيبي
معجب ليامن مشى درب ماغير مساره=لين ينجز ماتمنى بالغصب والا رضيه
الله اكبر والمناضل كيف غيّر في شعاره=علها خيره مدام انه يبا الشغله كذيه