بسم الله الرحم الرحيم
السلام عليكم ورحمة الله وبركاته
قصيدة موجهه الى اخوي وبناخي وابن عمي /
غازي بن غالب الدعجاني
اتمنى ان تنال اعجابكم
سلام مني عد ما غرد الطير=وعداد ما هبت هبوب الشمالي
سلامن احلى من حليب المباكير=واصفى من العد القراح الزلالي
للصاحب اللي مثل ابانات والنير=له ماقف ما غيرته الليالي
الصاحب اللي في ليال المعاسير=يرسي كما ترسي رواسي الجبالي
غازي ولد غالب زبون المخاسير=معرب ما بين عم وخالي
من روس قوم ينطحون الطوابير=الاد مفلح محتمين التوالي
لا ثور البارود مثل المعاصير=وجا للرمك وسط القتام اجتوالي
يثنون فوق معسكرات المسامير=والهم على طرح المجوخ مدالي
يا صاحبي وين انت يالله عسى خير=من العام ما جاني ولو اتصالي
ادق وارسل لك رسايل بتقرير=وبذيت خلق الله عليك بسؤالي
مرات ادور لك عذر وأي تبرير=وأقول فال الله ولاهوب فالي
واليوم لا ما هيب لحية معاذير=ماهيب عادة يا ظريف العيالي
ان كان ما سيرت جينا مسايير=ويلحقك مشروهي على كل حالي
يلحقك يوم ان لك معزة وتقدير=ويوم انك الاول ولا انته بتالي
أشره على الطيب واجنب عن الغير=لا هوب لا مكسب ولا راس مالي