فواز السعيدي
زيد نص وشيل نص وخل للدعوى خلاصة=وان فهمتو زبدة الموضوع مانتم حول نصه
ياعتيبة عن هذاك العلم مافيه انملاصه=شجرة الزقوم قصتها مع اهل الدين قصة
العمــــــدة
فلسلفة سواق باص من الفجر في ظهر باصه=تختلف عن فلسفة مبدع تعب في حبك نصه
العتيبي مــا اختلف ممشاه والدين اختصاصه=وانت ربعك مالهم في تركة الامجاد حصه
فواز السعيدي
يالله استر لايجي في عمدة الحي انقراصه=عقب ماشاف الهذيلي غص له فالحلق غصه
عزك الله يابلاد(ن) تحرص المومن حراصه=يوم راس الشر يومي جاه قصاص(ن) يقصه
العمــــــدة
السعيدي لو بغيت ارميه مايسوى الرصاصه=ماكسب فعلً جميل ولا جلس وسط المنصه
لا تقنــّص في ديار السبــــع مافيها قناصه=وان لقيت احـدن من الهذلان يافواز وصه
فواز السعيدي
العتيبي مايغادر لين نلوي فيه شاصه=وان برك للحمل ماله غار في ظهره نشصه
المعاني جيبها والجدر كمل له خصاصه=صاحبك يقصد هذاك الخاتم اللي طاح فصه
العمــــــدة
العتيـــبي ذيب ما ياقف مواقيف النياصه=والسعيدي حط عصه في محلً ما يخصه
لو نهلت من المجلد ماعمت عينك قصاصه=لين دربيت الحجر مدري على صدرك ترصه
فواز السعيدي
كان صادق لاتحوص ولايجي فيك اختباصه=لين تارد جم ينضح واغترف جمّه ومصه
كيف تضحك يالعتيبي كيف يطريلك هياصه=والزمان اللي مضى محلوق راسك من مقصه
العمــــــدة
السعيدي لو عرف سر البحر يمديه غاصه=لكن يكفيه يلقى له على شاطيه بصه
نلطم العايل وبعض الناس ماهر فالمياصه=البلد معروف تجاره وسمساره ولصه
فواز السعيدي
السعيدي فالمواقف مايجي فيه ارتعاصه=وان لقي له واحد(ن) منجوم في علباه رصه
وين هاذ الهرج يوم ازريق في عينه خواصه=يوم موس القوم حول فوق راسك ثم قصه