السلام عليكم ،
القلب في سوق الهوى لجلك يغيـض ويمتلـي=ماهوب راع مساومـه أمّـا أشتـره وإلاّ بعـه
يوم الشعور مداوله .. وش قلت لك وش قلت لي=راجع حديث العاطفـه وأقتـصّ دربـه وأتبعـه
وألاّ بلاش أنسى مافات ومات .. وأسمع ما يلي=لا تترك الملتاع واقف لك على راس أصبعـه !
لا تكسر شداد الجمل .. لين آكل لسـان الطلـي=وإليا نهض حظي وحظك شقّ صـدري وأجبعـه
من قال لك ( ما الحـبّ الآّ للحبيـب الأوّلـي )=يا خامس أحبابي معك نسيـت حـبّ الأربعـه !
أضحك معي .. وأضحك معك لكنّ لا تضحك علي=طبعـي علشانـك تعبـت أعوبلـه وأطوبـعـه
شتّتني وأنـا عليـك .. أميـح ميحـات الدلـي=ودخّلتني فـالزوبعه وأنا مـا أعـرف الزوبعـه
وغنيّت لك قافين والمعنى علـى وجـه ٍ جلـي=أختر حداها وأحفظه وأفتـح ضلوعـك وأطبعـه
أقولها .. وأن مـا تلقيّتـك .. تلقيّـت الخلـي=يا منبع الحـب الحقيقـي علّنـي مـن منبعـه