معجب العتيبي
ابن جوباح يطلب طلب لازم نلبيه=وراع الطيب لامن طلب محدٍ يرده
يابن جوباح الي فوقكم عدة مشاريه=سلامك ليش لاجيت يمي ماترده..؟
حمد بن جوباح
على معجب نرد السلام ومقصده فيه = ومعجب مع هل العرف بفعوله نعده
سلام ٍ حسنته ما تخارج من مساويه = أخاف آقوله ويختلط مزحه وجده
معجب العتيبي
ابن جوباح يبغى الصحيح وصار يخطيه=وعلى الدرب الخطا يالربع محدٍ يحده
ترا المسلم على نيته دايم مماشيه=وكلٍ في حياته مشى دربٍ يوده
حمد بن جوباح
ليا صار الخطا في حساب ريال وجنيه = معي وجهة نظر وانت جيبك كم يسده ؟!!
نوايا الناس ماهيب سوا واعطيك تشبيه = احد يبني جدار السكن واحد ٍ يهده
معجب العتيبي
رصيدي داخل البنك يارجال ماليه=ما اضنك لو عرفت العدد تقدر تعده
وثقيل الدم فالمجتمع محدٍ يدانيه=ولو زاد ابتسامه ويده فوق خده
حمد بن جوباح
رصيدك داخل البنك تبتاعه وتشريه = ولا احد ٍ طامع ٍ فيك من شان المكده
يامعجب كلمة الرجل تشرح لك مباديه = بعدها لك خيارك على وصله وصده
معجب العتيبي
اشوف صحيبنا يا..حمد كثرت طواريه=ولا يدري من اللي معه والا يضده
فزعناله من العام.. كبّرنا علابيه=وقفّا ينفخ ذروبه الله لايرده
حمد بن جوباح
صحيبك يا العطاوي عرفنا وش مواريه = من أيام العرب والعزاوي والأشده
ترا التكرار فالسالفه يحتاج تنبيه = ولن جالك كلام ٍ جديد الحين بده
معجب العتيبي
نعرفه ياحمد ونعرف منهو موصيه=لكن وشلون نثبت دليلٍ فيه حده
ترفق ياحمد والزعل لاعاد تطريه=ولا ضقت من الاخبار كبّر فالمخده
حمد بن جوباح
طلبنا الحق والحق يثبت عند قاضيه = عتيبه كلها بالدلايل مستعده
انا ماضقت لولا خبرك اللي تغنيه = ابيك تسرّنا بالعلوم المستجده