[فلاح مشعل الزراقي]

	القصيدة التي سماها بعض الحضور بـ (الصاعقة ).

الشعر خيل وفيها أصايل وتهجين = والكل فالميدان تعطي جهدها
وحدة تقدم لو معها ملايين = والخيل والفرسان تقعد بعدها
وحدة تجي فالسير بعد الأخيرين = وحدة ما تاخذ فاللقا طول يدها
وأنا ليا قلت القصيد أعرفه زين = أسوقها وتصير الأولى وحدها
آرد بها وأصدر ولن جيت بعدين = أثني على عد الرها وأفتردها
ما هي بعارية ولا أخذتها دين = ولا هي بصدفة حاجة(ن) معتمدها
ملك(ن) لنا والناس بالوضع دارين = و تعرف أهلها ماهي لمن هبدها
قلته بعد جونا الرجال الحشيمين = فالوقفة اللي كلبونا سندها
وقفت أرحب بالضيوف الكريمين = من بعد ابن خلف علي اعتمدها
معك يا خالي يا شجيع متواصين = و الرجل لأخواله و يحسب ولدها
حنا فرحنا يوم جونا الرباعين = والضيط أهل وقفات محد(ن) حجدها
وابن محيا من صقور(ن) شياهين = أحرار معروفة ليا جا هددها
شيوخ ما تحتاج دين وبراهين = شيخة قديمة عهد ثابت وتدها
يشهد لهم فالناس الأدنى والأقصين = شهادة(ن) حتى المعادي شهدها
وضيوفنا الباقين لا شك غالين = أهلا بشايبها وحضرة ولدها
يا مرحبا يا للي على الطيب مرهين = ترحيبة منا ما يحصي عددها
باسم ذوي زراق سقم الحريبين = العزوة اللي من بغاها وجدها
ربعي حزامي صف ما هم بصفين = ميقافنا واحد ليا جت عقدها
لمصامخ الصاحين ولا المجانين = مواقف(ن) محد علينا نقدها
حنا ليا جات الموقف مفادين = بالمال والروح ومعاها جسدها
قمنا سوا سابق ولاحق وذالحين = نعز بنيتها ونرفع عمدها
وحنا عتيبة من هوازن قديمين = اللي محد فالكون يلحق أمدها
عدونا نسقيه طعم الأمرين = وأمر من طعم الأمرين وأدها
ذباحة الحايل عذاب المعادين = وناس(ن) تكافت شرنا يا سعدها
ولا عندنا أهون من نحور البعارين = كم من عتيبي(ن) بخلبه لكدها
لجل الضيوف اللي عليه متلافين = وليا نحرها أصحى وكبده بردها
قبيلة(ن) وسط الجزيرة مرسين = من الحجاز لنجد هذا بلدها
عسر(ن) على أهل العسر لين لهل اللين = رحمة وشر ليا تزلزل رعدها
وعلى مقابل علية القوم ضارين = و نودب اللي نعمته ما حمدها
وليا عطوا مداتهم تكحل العين = يا حظ من وقت اللوازم قصدها
ومع الخوي دايم على جنبه يمين = ينسونه هموم الحياة ونكدها
يا من بهم من خاف من وقته الشين = ويلقى الثقة لو فابن عمه فقدها
وكل القبايل كفو من سابق الحين = تحمى مواقفها وتحمي سددها
واليوم حكم مروعين السلاطين ‍= اللي عداه بالسيوف تحصدها
آل السعود مكبلين الشياطين ‍= خلوا شياطين البشر في كمدها
بنوا لنا دولة على الشرع و الدين ‍= فالليلة اللي عودنا ما رقدها
عبد العزيز أبو الملوك العزيزين ‍= هو صقرها هو نمرها وهو أسدها
وصلت لعبد الله حبيب الملايين = بعد ترجل عن ظهرها فهدها ‍
وحنا يا بو متعب على العهد باقين = معك ومع سلطان والي عهدها
وأنته بعد وصيتنا فوق ثنتين ‍= دين ووطن ما نستهين بأحدها
اضرب بنا العدوان وتصير شطرين = وكرر بضرباتك عليهم وعدها‍
و يبقى الوطن والمسجدين الشريفين ‍= في نعمة(ن) كل(ن) عليها حسدها
حنا لها درع(ن) عن المستبدين ‍= لين النفوس تحط داخل لحدها
ونوصي عليها اللي ليا الساع جايين = وهيه توصي كل من جا بعدها
وأرفع يديني وأدعي وقولوا آمين ‍= يا الله ياربي من الخير زدها
وصلوا على خيرالرسل والنبيين = من هدم أصنام الكفر ما عبدها

	الشاعر/ فلاح بن مرشد بن خلف الزراقي ..