العازمي
يالعصيمي فيه موضوع(ن) قديم وعايدينه = شرهة العاقل كبيره يم اخوه ءمن الرضاعي
صورة(ن) كادت تسبّب في غرق جند السفينه = فالمحيط الاطلسي من حطّها فوق الشراعي
سعود العصيمي
هات علمك يالعتيبي والثمينه بالثمينه =من طلبنا حق خلصناه وامرالله مطاعي
لو ابه من يعلم اسرار الزمن زينه وشينه =ماتحصل من يحط ايديه في حلوق الافاعي
العازمي
قادها وجه النشب والمكر والحيله بعينه = واعترضها اللي منوّل نحسبنّه عقل واعي
صفحة الامجاد لو الوقت تطويها سنينه = في صدور الطيبين الها مكان عن النزاعي
سعود العصيمي
حيلة المحتال ماتنفعه يالصاحب تدينه = والحقايق عند اهلها لادعى للامر داعي
صفحة الامجاد للي طالت الطاله يمينه = مايحسب احسابها ويطولها غير الشجاعي
العازمي
ياعسا اللي جابها ياسعود دينك غير دينه = هقوتي ماقط خابت في حميدين المساعي
كل عدّ(ن) واردينه يالعصيمي واردينه = عندي الدفع الرباعي عندك الدفع الرباعي
سعود العصيمي
كل مسلم دينه الاسلام جعل الله يعينه= من سعى للخير يلقى خير لايخشى الضياعي
انته الليله تباها حرب كانه حرب سينه= جاردٍ سيفك وماشي لاتهاب ولاتراعي
العازمي
الكلام اللي تقوله وين عن مبداك وينه = يوم في سوق القطيف اللي شرى ياسعود باعي
انت عاقل تعرف اللي دس فادراج الخزينه = زبد بدو(ن) لويشوف الشمس يارجّال ماعي
سعود العصيمي
مانقول الا كلامآ بالثبوت مثبتينه = محتسينك فالهجوم ومحتسينك فالدفاعي
خلها بصرارها ثم ودها لاهل الدفينه = لاتحمل نفسك ابحملٍ يفوق المستطاعي