الــــــــــــــهــــــــــــــيـــــــــــــــلا
بديـت مـن هجـس الـفـواد وصميـمـه = من هيض فيض أمواج بحره ملاطيـم
بـسـم الــذي مـوسـى نـبـيـه كلـيـمـه = رب الـمـلا منـجـي خلـيـلـه ابـراهـيـم
هـاض الخفـوق وصـار للشعـر قيمـه = وجتنـي هواجيـس القصـايـد مقـاديـم
تــواردن مـثــل الضـمـايـا المحـيـمـه = ليا جـن مـن المضمـا حيـام ودراهيـم
وصدرتهـن ترحيـب قــدر وحشيـمـه = مثـل الذهـب قيمـه واصالـه و تقيـيـم
مــا حــط غـيـري فـوقـهـن وسـيـمـه = مشاعـري بالصـدق مـن غيـر تعتيـم
أعـرف بحـور الشـعـر دون اتعليـمـه = ولا احتـاج فـي وزنـه ونـقـده تعالـيـم
واتعـب علـى فـتـل البـيـوت العقيـمـه = واصيـد شردهـن مـثـل شــرد الـريـم
وفـي مثـل هالموقـف ذلولـي هميـمـه = ليـا ناظـرت عينـي وجـيـه الشغامـيـم
أقــول وبـمــا اقـــول ربـــي علـيـمـه = لهل الوفـاء نسـل الحـرار الصواريـم
يـامـرحـبــا تـرحـيـبــةٍ مـسـتـقـيـمـه = لربـوعـنـا والـلــي لـفـونـا مـعـازيــم
ترحـيـبـةٍ مــــن مـبـتـداهـا سـلـيـمـه = مثـل العسـل فـي در عــربٍ مجاهـيـم
واهــلا هــلا مــالاح بـــراق غـيـمـه = نــوٍ مــن القـبـلـه سـحـابـه مـراديــم
طيبـه علـى المحفـل يذعـذع نسيـمـه = وعـم المكـان بريـح عنبـر واشامـيـم
فــي حفلـنـا والـجـو صـافـي وديـمــه = والـطـيـر غـــرد بالـغـنـا والـتـرانـيـم
يــومٍ نـشـوف ابــه النشـامـا غنيـمـه = وانــا كرمـكـم مــن كـبــار الـمـلازيـم
نـفـرح بتشـريـف الـرجـال الكـريـمـه = خـطـلان الايــدي طيبـيـن المفـاهـيـم
اصحابـنـا وأهــل الـديــار ا لمقـيـمـه = والـلـي لفـونـا مــن جمـيـع الاقـالـيـم
مــال الـعـظـام الا التـحـايـا العظـيـمـه = الله يحيـيـهـم عـــدد مــاطــر الـغـيــم
فـي مهرجـان أهـل العـقـول الفهيـمـه = ومـزايـن الـبـل ضافـيـات الخراطـيـم
عـتـيـبـة الـهـيــلا نــديــم ونـديــمــه = ربـعٍ علـى كسـب الجمايـل مضـاريـم
قـبـيـلـةٍ بــيــن الـقـبـايـل حـشـيـمــة = وتكسـب بصالتهـا مـن الغـيـر تنعـيـم
ويــوم إنـهـا مابـيـن فــوز وهزيـمـه = سـجـل لـهـا التـاريـخ فـعـل ومعالـيـم
عـلـى ظـهـور امـنـاتـلات الشكـيـمـه = طـابـت افـعـول اموسعـيـن الاكـامـيـم
ومـجــدٍ يـخـلـد للـفـعـول الجـسـيـمـه = علـى صفـا التاريـخ منقـوش ومقـيـم
ولا ودي اسـتـطـرد بـمــورٍ قـديـمــه = تـعـرف ولا فيـهـا جـــدال وتـواهـيـم
وأكبر شرف رضع النبي مـن حليمـه = وأمضى الطفوله فـي رحـاب المغانيـم
وعلى النقاء واصل الشرف مستديمه = حـنـا هــل النـخـوه وبالنـخـوه نهـيـم
وادخل على الله مـن خطـات الظليمـه = كــل القبـايـل فــي المـراجـل مقـاديـم
حتـى رجـع سلـطـان نـجـد وزعيـمـه = صوب الريـاض ومعـه قـوه وتصميـم
جاها مـن المشـرق علـى بنـت ريمـه = وقسم جنوده في حمى القصر تقسيـم
ودخــل بـهـا عـنـوه بـقــو العـزيـمـه = وحطـم مـعـزي كــل الارقــام تحطـيـم
وعقـب أنجلـى ليـل الظـلام وعتيـمـه = وقرت لبو تركي وجت له علـى التيـم
قضـى عـلـى كــل الفـتـن والجريـمـه = وسـاد الامـان وحكـم الشـرع تحكـيـم
وصــارت عـلاقـات القبـايـل حميـمـه = على هدى المصحـف وطبـق التعاليـم
واليـوم فــي حـكـم المـلـوك الحكيـمـه = نعيـش بامـن وعصـر نهضـه وتعليـم
عهـدٍ عـسـى المـولـى عليـنـا يديـمـه = فــي ظــل حــلال الامـــور المبـاهـيـم
فـي ظـل مـن يمسـح ادمـوع اليتيمـه = هـذاك أبــو متـعـب زعـيـم الازاعـيـم
وتبـت أيديـن أهـل الحسـد والنميـمـه = ولهـل الـوفـاء مـنـي تحـيـه وتسلـيـم
نــواف بــن عبدالعـزيـز بـــن رازن