عبدالله الحربي
يا عنك لو كسرت يدينك يالعتيبي ما تتوب= عن الكرم والطيب وعلوم الرجاله كلها
عوايد اهل الطيب تبقى كا الحجاره ما تذوب =من عادة الأجواد من جاور لها ما ملها
معجب العتيبي
ياعنك مابه مثلكم فالصدق يارجال الحروب=يا اهل العلوم الطيبه واهل السيوف وسلّها
ياصاحبي بعض السوالف عن بعضها ماتنوب=هات العلوم اللي على بالك نبا ندخلها
عبدالله الحربي
دامك تدير البنك وتجيك العرب من كل صوب=عطني علوم الأرصده وش دقها من جلها
احدن رصيده يا طويل العمر يعرف ومحسوب=واحدن رصيده صفر لو حاول بها ما احتلها
معجب العتيبي
يوم انك مدرس تفرق فالنجاح وفالرسوب=الاسأله ياصاحبي قربتها من حلها
المسلم اللي يجتهد يسلم من صغار الذنوب=ويطيح فيها واحدٍ ماقصده الا فلّها
عبدالله الحربي
صحيح راع الصدق يا معجب مع الناس محبوب= ليتك تقول فلان جنبها وذا قد لها
ما يتعب الفلاح غير السوس لا جا بالحبوب= لو انها يا صعبها لكن تجوز بحلها
معجب العتيبي
ياصاحبي ماني على كثر المجامل بمغصوب=لكنّ ابه هرجه ليامن جات قلنا خلها
لولا المحطات الصغيره مامشت بعض الدروب=لو ان بعض الناس لامن مر مايفطنلها
عبدالله الحربي
اثرك تاضع حبة الهيل الصغيره بالجيوب =تطبق عليها في يدك وتفكها وتشلها
صحيح فيها فايده للي يبي نفخ الذروب= وليا ركبت الددسن وجاك السنود ادبلها
معجب العتيبي
ياصاحبي لاعاد تنشبنا مع العالم نشوب=تقطع حبال المسبحه ثم الحبوب تفلها
لا لا تحللها على كيفك وتعثي فالشعوب=حتى الشعوب اللي لها لهجه تبا ترطنلها