علي فلاح العضياني
يا ربعنا اللي تغيّرتوا علينا تال الايّام=الله و لا الرفقه اللي ما وراها راس مالي
سلومنا ما تنافى مع شريعة دين الاسلام=ياللي نفيت السلوم و نافيٍ دين الكمالي
العازمي
العام ماقلتها تزمر علانا اللي ورى العام = واليوم تذكر صداقتنا بعد جور الليالي
السلم واحد وتعرف شرع ربّي سيد الاحكام = فالسلم ناخذ ونعطي مع صناديد الرجالي
علي فلاح العضياني
ما جاك غير الوفا يالعازمي في كل الاعوام=مار انت قلبك فضيخ و راسك من العرف خالي
امنوّل إنعدّكم وقت المواقف درع و حزام=واليوم تصنيفكم يا عيد صفر من الشمالي
العازمي
مافاد عرف العوارف ياعلي والدرب قدام = لو فار دمك وقلت اهروج ماعكّرت بالي
وراك تجحد مواقفنا بعد ماصرتو اخصام = وانته منوّل تناد العازمي قبل العوالي
علي فلاح العضياني
العارفه كيف يهرج يا عرب مع شخص طرمام=أحدٍ يحلّ العقد وأحدٍ يعقّد فالحبالي
وضعك منوّل تمام و تالي الايام ما دام=جيت متنكّس على راسك من علوّ الجبالي
العازمي
ذرب الخطا مايقابل فالمواقف واحد اخمام = هاذي حقيقه على مر الزمن فأوّل وتالي
ماني من اصحابك اللي هرجهم من تحت الابهام = يا ضعف هرجك ليا جات المواقف ياحلالي
علي فلاح العضياني
عن موجز العلم و التفصيل تكفي روس الاقلام=ضاعت علومك بعد ركب الرشا فوق المحالي
السلعه البايره فالسوق ما تنسام باقيام= وأنا أشري الغاليه بأثمانها والسوق غالي
العازمي
ياسرع ماتنحرف عن علمك اللي جبت ياغلام = اعماك عن ماقفك من يمّنا خشم الريالي
يالشاعر اللي صنعك الوقت مدري صنع الاعلام = اظن مالك وجود اليا صفا جالك وجالي
علي فلاح العضياني
يا سرع ما تنشنق فالمشنقه سوات صدّام=و تروح رجلاك تلعب فالهوى .... ياهملالي
أنا كما الفارس اللي في نهار الحرب مقدام=سوات عنتر و ابن غانم و ابو زيد الهلالي
العازمي
لن كان من موت صدام العرب بالحيل منضام = تعال واعوّضك فالطاغيه باصغر عيالي
اتعبت نفسك بكثر المدح وانته ضمن الاقزام = ماقلتها ,, قالها الاقصى قبل قول الموالي
علي فلاح العضياني
الكلمه الضايعه تطير مع ذعذاع الانسام=تطير معها ليا هبّت صبا و لاّ عوالي
لا تشمت الفالح اللي للعدا سطّام لطّام=ما غير أجاملك ولاّ أنته معي مالك مجالي
العازمي
الكلمه المبهمه تفسيرها تفسير الاحلام = واللي طرالك يابن ثعلي ترى ماقد طرالي
صحيح خصمك من العدوان دايم يلجم الجام = لكن لامن حضرت اتقول ياليتك بدالي
علي فلاح العضياني
حطّيت نفسك يابن عاصي مثل سلطان وسّام=و الفرق معروف ما بين الحقيقه و الخيالي
أنا ليا قمت لك يا عيد حظّك طاح ما قام=يا ليل مطولك ردّدها و قل يا ويل حالي