عبدالله الحربي
قالوا الجمهور تحضر حفلة الأسطوره =والعضياني لفاها من دياره عاني
قلت انا وش عاد لو انه يكب الكوره=تطلع الأرض السعوديه بماجد ثاني
علي فلاح العضياني
الجماهير السعوديّه ماهي معذوره=و التذاكر داخل استاد الملك مجّاني
وابك ماجد مثل نجمٍ يستدلّ بنوره=روح واسأل : كوريا و الصين و الياباني
عبدالله الحربي
انت اظنك من غلاه مزخرف ن له صوره =صورته حطيتها في داخل الديواني
ما اطيب اخلاقه ودوره ما احد ينكر دوره= يبتسم لا قلت جات أمطار بالسوداني
علي فلاح العضياني
ما نعلّق عندنا إلاّ صورة أخو نوره=الملك عبدالعزيز الحاكم السلطاني
الرجل باخلاقه و فعله و من دستوره= و العرب ما هيب بالاشكال والالواني
عبدالله الحربي
يالعتيبي صاحبك عبدالله اسمع شوره= كلمتي لك يالعتيبي جعل ما تعصاني
عوّد لربعك وخل الحفله المشهوره=لو خذا مليار كامل ما عطا العتباني
علي فلاح العضياني
الهلاليين يا ( كاف البلا ) مقهوره=من ريال مدريد نجم الدوري الاسباني
كلّ رجّال ايتشرّف بالحفل و حضوره=انت ما تدري ترى اللي يحضره ( سلماني )
عبدالله الحربي
صاحبي علي العضياني طلع من طوره=لجل ماجد ما يقابل ياسر القحطاني
لو عمدتهم يقرشع باللقاء بقدوره=كيف ينسى سام 6 ماضي الأزماني
علي فلاح العضياني
وين واحد عند واحد يا زعيـــــــم الثوره=ماجد أهدافه ترجّح كفّة الميزاني
روح تابعها على الإي آرتي محصوره=و إليا صابك ضغط قفّل فوقك البيباني
عبدالله الحربي
الهلال من الكؤؤس مسوي ن مقصوره =وصلن الخمسين يا رزاق يا رحماني
والنصر يالله دخيلك حالهم ميسوره=افتحوا درج الكؤؤس وطارت الترباني
علي فلاح العضياني
الهلال مع الحكم تمشي جميع اموره=والرئاسه خاوزت معكم بهذا الشاني
النصر دايم عليكم فرقته منصوره=الهريفي عمّكم و محيسن الجمعاني