السلام عليكم ورحمة الله وبركاته
قصيدة قرأتها وحازت على إعجابي وأحببت أن أقوم بنقلها لكم وهي للشاعر/
سعد بن مناحي بن شفلوت
أراعي دواليب الفَلـك والفَلـك دوّار=مثل من يراعي لايـح البـرق ويخيلـه
ما غير ايتحرى للطراقـي وللخطّـار=قد اشتد فوق ابله وسفّـط معاميلـه
أوجّه عربسات الطواري على الأفكار=لاجل تستهيض هجوس قلبي وتصفيله
على موجةٍ بالصدر كنها على الأقمـار=وأتابع على شاشـات قلبـي تماثيلـه
وأترجم نتايجها علـى لهجـة الشعـار=وأصوغ البيوت وكل بيـتٍ بتحليلـه
على شان تبقى طول عمري معي تذكار=قصيده ومطلعها (يادنيا من انتـي لـه)
قصيدة غشيمٍ صار له في الزمان أدوار=تعلّم مـن دروس الزمـان وغرابيلـه
أشكّل تقاسيم الليالـي بـدون أوتـار=واغنّي طواريـق الزمـان ومواويلـه
زمان لا عز جدار عوّد وهـد جـدار=والى زان ليله زاد سـوّه ميـة ليلـه
تقول أن من بيني وبينه مـن أول ثـار=على غير ماقلبي يبـي مسـرجٍ خيلـه
تقويت فنجال العنـاء والهمـوم بهـار=يوم ان الهناء كـل تقهـوى فناجيلـه
وإلى جيت أدوّر للسعاده مع الأمـرار=لقيت السعـاده بيـن لفّـه وتحويلـه
أشوف الغبن طول الليالي وأنـا صبّـار=وأقول احتمـال انّـه يغيّـر دواليلـه
زمان لا زاد إصرار زدنا عزم وإصـرار=لو ان الزمن ماهوب يجهـل رجاجيلـه
لا صار الرجل عزم وروابع وفعل وكار=وكفٍ تحـط بميلـة الوقـت تعديلـه
ما همّه ما جاه من الزمن زان والا بـار=وماصعّبـه وقتـه علـى الله تسهيلـه
لكنّ الزمن قام يحداني مثل مـا صـار=يالين الرشـا ماعـاد دارت محاحيلـه
زمان جعل بيني وبين الوليـف ستـار=ولافي يدي حيله ولافـي يـده حيلـه
صغيرٍ مكانه في الحشا ما عليـه غبـار=خفوقي تحت حكمه وقلبـي مداهيلـه
أراعيه لو إنّـه بعيـدٍ عـن الأنظـار=واحسّب سنينـه واتحـرّاه وادعيلـه
ولَعته مثل طيـرٍ تولّـع بـه الصقّـار=يشيله علـى كفّـه ولاهـو بيمهيلـه
على أول هداده ما بعد فاخت الميكـار=لامنه اطلقه واستبعـده قـام يوميلـه
هويته زمان فات عاد الكبـار صغـار=قبل مايغصبونه هلـه يلبـس الشيلـه
على شانه أخذ لفّتين علـى الفكسـار=أعرّض علـى بيتـه وقلبـي وعينيلـه
ولو كان أهله ما نعينه مـن المظهـار=لكن شوف بيته يجلـي الهـم ويزيلـه
حرامٍ لو إن ما هو بخيرة حمـام الـدار=ماتطرحني سلوك الهوى فـي محابيلـه
تحيات أخوكم
فيصل المسعودي