سلطان الجـذع
تعال ياابو زيد دوبه ليلنا في مبتداه =الاولة يامرحبا والثانيه في حلها
وراك يم الاحمدي سافرت عن حيد الحصاه =اللي زمانٍ فات جدك مستريح بظلها
ابو زيد
مدام يا سلطان تبغا النجم ينزل من سماه = الاوله دام البقا والثانيه وش حلها
ان رحت يكفوني عيال العود في كل اتجاه = ولا جدودي دارهم محدٍ قدر يحتلها
سلطان الجـذع
عندي يقين ومعرفة مافالعباة الا العباة =لكن لسيوف الملاقا حق يوم اسلها
يالعاطفي محرمك مرعا نجد فالماضي وماه =ديرة جدودك كلها تحت احتلالي كلها
ابو زيد
اسطوره العتبان لا ينشب لسانه فى جماه = وسيوفك يوم الملاقا يالجذع واااا ذلها
العاطفي يكفيه خلاكم تسوقون الزكاه = وكبودكم ابسمها ماتت وباقي غلها
سلطان الجـذع
عزالله اني مارميت الوعل لين الله رماه =(يامل عين واجهت ديانها ياملها )
ماهو مسويها ذليل هج داره ماحماه =يوم أقبلت له غارة كعام العدا مااقبلها
ابو زيد
زومان ميزنا هديره والجذع نسمع رغاه = حملته عجز يشلها جيبو بديل يشلها
نسيت يلي فالبحر تبحث على طوق النجاه = وغارتك رده خايبه مع قوم ما تقدر لها
سلطان الجـذع
انته كلامك ياطويل العمر مايبنى علاه =واللي بدون ثبوت في داخل ضميرك خلها
العلم في بطون الكتب موجود وصدور الرواه =قحطان لو اشتالت العاني تراه احسن لها
ابو زيد
مثبت الحجه ومن دور على شيٍ لقاه = (اقولها واللي عقد روس الحبال يحلها)
لا والله الا فعل فى نجد العذيه والسراه = ولا عتيبه في بيناخيها دموع يهلها
سلطان الجـذع
اللي تطرف حلقها ماقدمها غير الذكاه =ياليت ابو زيد العلوم السارية يفطنٍ لها
يارب سامحني تراني مذنب بجاري هذاه =أسّوقه سوق العسيف اللي تسابق ظلها
ابو زيد
واللي تغط رويسها فى الرمل فارقها الحياه = يليت ما تقطع صلاتك والفريضه صلها
خمخمتها واخطيتها والذيب جاب الله عشاه = الرقط سايل دمها والعور وش نعمل لها