[الحالم]

هذه قصيدة الشاعر الامير خالد الفيصل

من رياض المجد لامجاد الكويت
=من ثبات العلـم للعلـم الثبـات

جيت أصافح بالتّهاني كـل بيـت
=للشّهيد الخلـد والحـي الحيـاه

فوق غيمة شوق من أبها مشيـت
=من نداها فزّت الصّحرا نبـات

سيّرتني نشوة الحـب وسريـت
=للكويت الّلي هويت أكتب غنـاة

في غناتي للشّرف صوت وصيت
=ومن غناتي يرفع الفارس حـداة

وللكرامة عرضة في كـل بيـت
=والسجايـا بالشهامـه نايفـات

ياالكويت الّلي على الباغي عصيت
=يوم بعض الرّبع ينسى المكرمات

يوم بان الغدر قلنـا لـه خسيـت
=كل شيطان رجمنـاه بحصـاه

دارت الدنيـا عليهـم واعتليـت
=وانهزم جيش النّفوس الخاينـات

يالفهد عند الوعد قلـت ووفيـت
=طاغيات الرّوس عادت صاغرات

مااختلفت ولاذخـرت ولاشكيـت
=شامخ مثل الجبـال الراسيـات

دلّـك الله يالسنافـي واهتـديـت
=والنّصر من عند رب الكاينـات

مايغـط الحـق رجـال بخيـت
=مانسينـا يالكويـت السابقـات

يوم عز بدارنـا حلـو المبيـت
=إستضفتونـا زمـان النّايبـات

لين ابو تركي ظهر من فوق هيت
=واصطفق من نجد لجبال السّراه

يرفع القرآن والسيـف الصليـت
=واسترد الحكم من عقب الفـوات

ياالصّباح وياالسعودي لى انتخيت
=عزوتك عناز راعي الطّايـلات

ويالامير الّلي على العليا نشيـت
=جابر العثرات محمود الصفـات

في بـلادك كـل تكريـم لقيـت
=والنشامى ماكتفـوا بالواجبـات

بالكويت أعطاني الشعر وعطيـت
=وبالكويت الشعر له طعم وحلاة