علي فلاح العضياني
سلام تسليم شاعر مبدعٍ في بدع الامثال=تنشر له البيض في روس الطويلات المنيفه
يا ربعنا اللي تسبّبتوا لكم في موت رجّال=حسبي عليكم وراكم تقطعونه من وليفه
سلطان الجـذع
يامرحبا مرحبا ترحيب وافي فال وعقال =اخذ إلك فنجال كيف يكيّف الضرمان كيفه
انا ادري انك يابن ثعلي علاك من الله ظلال =والله مانجمع الدوتي مع ثياب القطيفه
علي فلاح العضياني
سقنا لك الجاه بوجيه العرب و الحال و المال=على سلوم الرجال و ملة الدين الحنيفه
انته تعرف انّ سهم الحبّ يا سلطان قتّال=خصّ ليا صار الشريف يحبّ له وحده شريفه
سلطان الجـذع
ذكرتني في علوم قبل . . ماتطري على البال =وسلكت بعض الدروب اللي على مثلك كليفه
عيال عساف مالك عندهم ياعلي منزال =اهل المحاني بخير ودارهم دايم مريفه
علي فلاح العضياني
انت متغيّر على شانك ما حصلت لك مدخال=و لا لقيت اسمك امس العصر في عرض الصحيفه
الله يسقي ديارك يالجذع من كلّ همّال=ادعي لكم بالحيا و الخير و النيّه نظيفه
سلطان الجـذع
راع الصحيفه خبيث وريس التحرير دجال =وعمك لميدانها من زمله يقود الضعيفه
ماهقوتي حيلة المحتال تمشي فوق محتال =لاعاد يمي تسوق شعيل وحموله خفيفه
علي فلاح العضياني
ما قلتها يوم رحت تقول انا نقّاض فتّال=مندوب عن عزوتي مثل ابن رحمه وابن ريفه
اخطيت في حق ابن ثعلي عريب الجد و الخال=تقول خلّه يموت يعيش يالروقه بكيفه
سلطان الجـذع
ماتحجب الشمس ياعلي العضياني بغربال =وكبيرنا ماتجمل ,,,,شايفٍ لي فيه شيفه
الله يعين الذي عليه وقته ياعلي مال =حكم القدر يجرح الرجال وسيوفه رهيفة