الحر النادر
سلام رديه لها في كل بحر(ن) جيلبوت = تمشي على حسب العوايد باسم موروث الادب
الفرصه اللي من ذهب تكفون عنا لاتفوت = اليا تردى من تردى في مطاليق العرب
مرزوق حمدان
يامرحبا ترحيبة ٍ تسبق وتعلا كل صوت = ياللي تسلم مرحبا ونقول بالميدان طب
اكرب حزامك يالعتيبي وادحم اكبار البشوت = انته زبون المجد والتقدير والعصر الذهب
الحر النادر
دام البقا والشعر من شرواك لايمكن يموت = والمطلب السامي ينومس كل رجل(ن)منتدب
خوتك مكسب والليالي طعم مر وطعم توت = وانا سمعت بعلم كانه صدق يارحمان اجب
مرزوق حمدان
احيان عن بعض الكلام انقول يازين السكوت = واحيان بعض القول نعتبره على العارف وجب
انته عتيبي والعتيبي من كبيرين البخوت = فالماقف الغصاب ماتفتر عضوده والركب
الحر النادر
الحظ سيف(ن) يضرب الامتان والا الرزق قوت = والاستفاده منك مضمونه لياحل الطلب
الريح شيخ الاشرعه والبحر الاحمر فيه حوت = واللي لقا اللولو لاعاد الشط يبشر بالشبب
مرزوق حمدان
اللي يبا الطالات مايبقى على وضع الثبوت = والرزق واليوم المحدد فالكتاب اللي كتب
انته ليا جيناك تفزع والوفا ينبت نبوت = وسط الرجال الطيبين اللي لهم ربي وهب
الحر النادر
من لاعرف ياصاحبي ماعاد يامن بالوقوت = الناس تنجح في مدارسها وهو شاطر رسب
ندور اللولو مع اللي عارفين(ن) في اليخوت = اللي تبسم في الوجيه ولاعليها من الغضب
مرزوق حمدان
الليل والميدان والمعنى ليا منك سموت = ابشر بجمهور ٍ يشيلونك على متن السحب
مادام هذي همتك قدام لاتبدا تشوت = احسب حساب لهجمة ٍ يمكن سببها تنغلب
الحر النادر
البيت ياذيبان في الدنيا من كبار البيوت = لكن الى ذاالحين ماحصلت منه الا التعب
احيان يذبح لي طلي واحيان يشري باسكوت = الاوله صارت طرب ولاخره صارت نشب
مرزوق حمدان
اليا لبست الثوب ابو طقطق وحطيت لك كوت = قالوا لك العدوان بالميدان يانعم الشنب
من بعد ماشفنا العجب نبكيك ياعصر الفروت = نبكي على عصر الفروت وياعجايب ياعجب
الحر النادر
ليت البلا لاحل ماياتي مصلين القنوت = والخبره اللي قدموهم روس مافيهم ذنب
ماقدر المولى على الانسان ماضي..والبلوت = ما ربح الشاري بحكمه جعله امحق من لعب
مرزوق حمدان
مازال براق الخيال اللي نشا نوره خفوت = والذيب بادي بالمبادي مار توه ماقنب
ياللي على معناك ماقصرت في رسم البيوت = صحت لسانك ياعريب الساس واسمح فالعتب