سعود العصيمي
الاوله ياصاحبي قبلان مبروك الوسام = والثانيه ماعاد باقي غير تظهرها معه
احفظ حلال اعيالك بشاهدك يحماك النظام = وقتك هذا حبل الوصل مابين الاخوه يقطعه
قبلان الدعجاني
الله يبارك فيك ياسعود العصيمي والهمام = عطنا علومك كلها والعلم مني تسمعه
الوسم في خد المطيه ياعزيزين المقام = وإن كان ماطاعك زمانك يأبيض الشارب طعه
سعود العصيمي
العلم حمضه جاك ياقبلان مافيها كلام = مانته بجاهل فيه ياقبلان جاك وسنعه
لوان للوجه الرضي ميزة عن الوجه الحرام = ماضاع للمسلم حلالٍ في الليالي ضيعه
قبلان الدعجاني
امعاملتكم جاتنا عوّد علينا عقب عام = يمكن نهد الطير بسبوقه ونحذف برقعه
ياسعود خلك طال عمرك من طحي إليا سنام = واحسب حسابك يالعصيمي وإضربه ثم اجمعه
سعود العصيمي
يالمستلم من واجبك تدوين دور الاستلام = يلزمك تكتب ماحصل من شر والا منفعه
ياصاحبي قبلان مانقبل طعام بلا يدام = انكان عندك علم غير العلم الاول طلعه
قبلان الدعجاني
المستلم ماعاد يبغى لاشراب ولا طعام = لكّن ياسعود العصيمي روح عنا فالسعه
من بعد ماسالت على راسك هماليل الغمام = الوادي اللي قدم عينك منت قادر تقطعه
سعود العصيمي
بغيتك تسوق الجمل وتشد راسه بالخطـام=لكن بالتوفيق والمقسـوم محـدآ يمنعـه
لاصعبت الدعوى على قبلان صدرنا الحيام=اليا حضرنا راس نهوي به وراسٍ نرفعه