خالد العصيمي
عقب ماطرف الليل الطويل وحان ميعادي = معك ياهاجسي هات الجزيل وعده ومده
سلام الله سلامن مثل ريح المسك والكادي = على الي لاوقف في ماقفه قال ان انا قده
ناصر الجلاه
ألا ياليل لوطولت ماميلت في شدادي=ولا ياهاجسي كأعادتك عد الجبل عده
هلا يامرحبا واعداد براقٍ ورعادي=على مقدم خيالٍ سيل الضلع وجرح خده
خالد العصيمي
ولا يالليل لايفضحك نور الصبح من غادي = يجيك السيل من ذاك الجبل وتعود اترده
يدوم لك البقا وبقى بدرب الناس الاجوادي= انا عندي مثل والبيت كشفه يشبه لهده
ناصر الجلاه
ياخالد دوب زان الليل ميعادك وميعادي=وعلمٍ وسط صدرك يالعصيمي قدمنا بده
انا باقي على سلمي وسلمي سلم الاجدادي=تفضل يالحكيم اللي يشب النار من زنده
خالد العصيمي
كسينا العيطموس اثيابها واثيابن اجدادي = يزيد ابها الحلا لاشافت ان الثوب ياجده
انا باشوف ياذاك الجمل لاوين تنقادي = مع ادروب الجمال الي تشيل الحمل من مده
ناصر الجلاه
ترى بنت العرب خطابها سرداد مردادي=وكلٍ قال تنقض لجلي المجدول وتكده
تعر إن الجمل في سكته ماهو بمتحادي=على دربه ودربه عز محدٍ قادر يلده
خالد العصيمي
يقولون العرب والكل لجل اعيونه ايفادي= وكلن يفتل احبال الموده لا لقا نده
بعير القوم بوسومه يا ناصر ضاهرن بادي = ولابه فود كود انا على المليون بنهده