[علي فلاح العضياني]

السلام عليكم

قصيده اتمنّى ان تحوز على اعجابكم

إليكم القصيده

عسى ربّي يجيب الفرصه اللي تجمع الاحباب=يا زين اللحظه اللي تجمع الغالي مع الغالي
أنا احسب للقا في ما مضى من وقت كل حساب=سنه ثم شهر ثم أسبوع ثم أيام و ليالي
أببذل كل مجهودي بشتّى الطرْق والأسباب=عسى ربي يعجل بالفرج في كل الاحوالي
لمحته قبل مده من بعيد و خاطري ما طاب=وانا ظنّي لو انّي ما لمحته يمكن أشوالي
لقيته في محلاّت العطور يسعّر الاطياب=و هو مضرب مثل بالزين تضرب فيه الامثالي
يشكّل زينها على جميع العاشقين إرهاب=تزلزلهم بنظرات العيون السود زلزالي
طبيعي تلفت انظار الجميع و تكسب الإعجاب=وتمشي واثقه من نفسها بالزين تختالي
و انا لولا سلوم جدودنا و الدين والآداب=آحذف شماغي اللي فوق راسي و أحذف عقالي
و من هاك النهار القلب من نار المحبه ذاب=و انا ماني مصدّق كيف ذاب القلب طوّالي
من النظرات الاولى ولّعت في قلبي المشهاب=وألا يا وجد حالي وجد من حالي على حالي
جروح الروح من فرقا الاحبّه مالهنّ أطباب=دواها شيّ واحد .. ؟ شوفة اللي هو على بالي
ما غير اجرّ صوتي كل عصريه على المرقاب=أجرّ الصوت في راس الطويل النايف العالي
على درب الدجيما فالهوى والشمري و عقاب=طريق الجيل الاول بعدهم يمشي به التالي
بعد ما سرت في درب الهوى ما عاد لي مجناب=و لا فكرت في مطلاع نفسي قبل مدخالي
عسى ربّي يجيب الفرصه اللي تجمع الاحباب=يا زين اللحظه اللي تجمع الغالي مع الغالي

التوقيع

(( رأس الحكمه مخافة الله ))