أتشرف بإطلاعكم على كل ماهو جديد
وهذة قصيدة إهداء للآد عاصم قطمان المحازم
وإنشاء الله تجملني فيهم
يالله يامنشي صدوق المخاييل=ياعالمٍ مافي الخفا والبياني
أذكرك يالمعبود في تالي الليل=وأطلبك لدروب الهداة تهداني
واليا بغيت أمدح زحول الرياجيل=ماضنتي بيت القصيد يعصاني
الشعر له في وسط قلبي مداهيل=بين الضلوع القاسيات المحاني
أطوع الشرّد وأجر المواويل=وأمدح هل الطاله طوال اليماني
أهل الوفاء والطيب والعرف والخيل=الآد عاصم مزبن الكل جاني
أن كان راحت للسيوف المصاقيل=تشهد لهم شلفا ورمح وحصاني
وأن كانها راحت على البن والهيل=مايذبحون ألا خيار السماني
وقت الملاقا يشربون الفناجيل=ما همهم قولت فلان الفلاني
قومٍ تضد الخصم وتعدل الميل=يشهد لهم في الناس قاصي وداني
أهل الكرم والعز قومٍ حلاحيل=مافيهم اللي لأظلم الوقت شاني
أصغر ولد فيهم يقود المشاكيل=أن كانها جارت ليالي الزماني
وأكبرهم اللي ينطح الجدي وسهيل=متعليٍ فوق النجوم الثماني
يشهد سنام ويشهد طحي وعصيل=وتشهد لهم حتى ظهور السواني
لطامة العايل وذباحة الحيل=لا جاء لها الطرقي من الوقت عاني
قلته ولا أبغى من وراهم محاصيل=كود أن لهم بالقلب قدر ومكاني
ولا أذم أحد في الناس جيلٍ بعد جيل=متوارثين الطيب من عود فاني
وأنا مشاري وأحتمي القول لا قيل=وما جال في قلبي نطق به لساني
والمعذرة لن صار في الهرج تطويل=بختم بريح الهيل والزعفراني
مشاري بن معزي الشلاحي