سلطان الجـذع
ياصاحبي معجب بعد توقيع عقد الاتفاق =وراك ماطبقت يالروقي بنوده كلها
ممسي تقول انته شريكي فالجمال وفالنياق = والصبح وسمك فوقها وتقول أنا راعٍ لها
معجب العتيبي
ياصاحبي هجمه بلا تخطيط سموها اختراق=والسالفه ياصاحبي ماهو كذا تدخل لها
ياصاحبي ذكرتني قصة قديمين النفاق=قالوا نبا نص الغنايم والمعارك خلها
سلطان الجـذع
ياللي تظنون الفراق ,,,ألتف ساق فوق ساق =والاوله في حلها والثانيه في حلها
بعض العلوم تثير من بين القريبين الشقاق =وانت متحادي يالعتيبي والدروب تزلها
معجب العتيبي
الفرق واضح والزمن دوار والدنيا سباق=والاوله جتنا كذا والثانيه ماملها
صدام مات ولا بقا فالمجتمع غير العراق=واضحت بلا حاكم وكلٍ قال كيف احتلها
سلطان الجـذع
الصبر لامنه تعدى الحد مرٍ مايذاق =ياللي عقدت العقده احسن تدّور حلها
بعض العلوم مخالفه ماتندرج ضمن السياق =متى البعيده ياوسيع المعرفه تأصل لها
معجب العتيبي
الصبر مفتاح الفرج لكن يبشر بأحتراق=لاصار ماله فالوجود شهود لا لا يعلّها
الظاهر انك يالجذع جيت المشاكل بأشتياق=واصبحت ترسل ناقتك عميا ولا تفطنلها
سلطان الجـذع
حملت نفسك ياوسيع المعرفه ما لا يطاق =وانته فهيمٍ فالدعاوي والدروب تدلها
انا سقيتك من فنون المعرفه كأساً دهاق =ليتك مثل طير السعد تنقض لها تفتل لها
معجب العتيبي
ياصاحبي بعض العلوم علوم والدنيا وفاق=وانا اشهد انك للحمول الكايده كفوٍلها
ياربعنا سلطان تو انه من الكاسات فاق=ويضنه الساقي وهو مسقي ونفسه غلها