السلاام عليكم ورحمة الله وبركاته ..
مساءكم بوح .. وكبرياء ...
..
..
/
جلسة .. وقامت بعدها حرب الاعصاب=واعصابي امست من غلاك امحروقه
ياللي تلد العين في عروة الباب=لد النظر .. فاللي تعنّى بشوقه
وش عاد غير الصد تحسب له حساب=وانا معك ما بين سرقه وبوقه ؟!
اسايرك بالهرج .. وتقول كذاب=وتخطي .. واقول ان الخطا ما تسوقه
وتجرح .. واقول ان زاد جرحي ولا طاب=بكره يطيب ويشفي الله فتوقه
رمش ٍ على عيني قضى عمره وشاب=يا كن عيني .. للصياح امخلوقه !!
يا موجعٍ قلبي ولا عندك اسباب=جريت في دمّي .. وذبلت عروقه
وحملتني ذنب الغلا والتغيّاب=وغفرت لي ذنب القصيد وعذوقه
لكن .. اببقى في مواصلك طلاب=وارد روحٍ فالبعاد امخنوقه
يمكن .. يصادف موعدٍ بين الاصحاب=وتشوف وجهي من تميّز فروقه !
من زود مابي من غلا ترف الاهداب=اللي خذا من حر كبدي حقوقه !!
ويمكن .. يردنّك مشاريه وعتاب=ويعود وقتٍ فيه بسمه سروقه
تسرق ولا تابت .. ولا ذنبها تاب=ونفسي على السرقات ماهي شفوقه
ويمكن .. تحن ونرجع اصحاب واحباب=ويمكن .. تخليها قطاعه وعوقه
ويمكن .. قصيدي منّه تروق الاعصاب=اللي على طول الزمان امحروقه
وسلامة من يقرا .. ويسمع ...
فيصل الثبيتي
الاربعاء ..
9 / 4 / 2008 م