طلال الثعلي
يامرحبا ترحيبة تملا موازين الادب=عند الرجال اللي بهيبتها تحفظ احقوقها
الليل يامرزوق خلك حاضراً عند الطلب=عاين بعينك فالمزون اللي تلوح بروقها
مرزوق حمدان العتيبي
دام البقابك يالمرحب واجب ٍ عندي وجب= اكثر من انجوم السما والارض واللي فوقها
طلال ابن ثعلي شنب ويقابله شاعر شنب = والطيبه من حظنا ليلة دخلنا سوقها
طلال الثعلي
العقل ميزان الرجال وكل شي(ن)له سبب=الحالية فيها الحلا والثانية ماذوقها
طلال ابن ثعلي يحملك الملامة والعتب=لكن عينك يالعتيبي لايغمض موقها
مرزوق حمدان العتيبي
اللي يبا يصرف ذهب نعطيه من بنك الذهب = والعمله اللي مالها قيمه قفل صندوقها
ان كان لك لوم وعتب نرضيك يافخر العرب = مار انتبه للحيه اللي سمها بشدوقها
طلال الثعلي
انت تعرف ذيب السرب...ماعندكم ذيب السرب=ذيب السرب شلفاه دايم فالنحور يسوقها
العام تحشد لك حشوداً مايشيلون الرتب=لو اعجبتك اشكالها مايعجبك منطوقها
مرزوق حمدان العتيبي
انته ظلمت الحظ يارجال لله العجب = فتح عيونك للذيابه وانتبه لحلوقها
ياللي تشب النار اخاف انك تصير إلها حطب = ثم بعدها تعرف مواقيف العرب وفروقها
طلال الثعلي
مايلحقك شكة وريبه وانت مرموق النسب=حنا نبيك تردها وانته رجعت تحوقها
ياليتهم نادوا على الشله مكافحة الشغب=انتم على ليل وطرب والبدو تحرس نوقها
مرزوق حمدان العتيبي
انا لها ياصاحبي واطوّع اشعيل الصعب = والدار فيها خير والاجواد طاب اوفوقها
كم واحد ٍ لاشتدت الازمه عن حقوقه هرب = والارض قدامه براح ويشتكي من ضوقها