السلام عليكم ورحمة الله وبركاته
اخواني الاعزاء كما كتب في العنوان فهي قصيده غاليه ويزيدني فخر تواجدها بين قصايد نخبه من الشعراء المميزين في هذا المنتدى وحتى
ولو لم تحصل على اي مركز فانا تشرفت بمشاركتي مع هولا الشعراء
يطربني المسيـار بـارض خليـه=دار الحيا شوق الرجال الطحاطيـح
ياجعلهـا لسيـل صبـح وعشيـه=من وبل همال المـزون المروايـح
لينن كـل شعيـب ركـب إردّعيـه=ولاغاض ماه انهل فوقـه كواثيـح
حقوق وسم(ن)من جزيـل العطيـه=من وقع سيله جرح الارض تجريح
نهـار رابـع بـذرة الخـد حيـه=ومداد وليه بالعشـي والمصابيـح
عشريـن لليلـه ماتخالـف نويـه=وعقبه يزين البـر للهل المراويـح
خطوا الرجال اهل الظفـر ولحميـه=نزهين جمعاهم على هبـت الريـح
ومن الحزابـه ولمـو كـل شيـه=تواعـدو مـرواح ولا مسـاريـح
وطبولهـم قفـراً عشوبـه نديـه=متخالطن نوار نبـت الصحاصيـح
تضحك زهوره فالفيـاض العذيـه=وفيه ام سالم تزعج الصوت وتصيح
ولاهب ذعـذاع النسيـم ضحويـه=جا للخزاما والشمطري معه ريـح
ثم شـب نـاره راعـي الشاذليـه=وصكو عليه اهل الوجيه المفاليـح
وجا للسوالـف والشعـر قابليـه=وفنجال كيف يّنـزّح الهـم تنزيـح
انشهـد انهـا سجتـن عالمـيـه=مامثلها عنـد الرجـال الزحازيـح
تسوى القصورالـي قببهـا علّيّـه=لوذهبـت بيبانـهـا والمفاتـيـح
وسلااااااااااااامت الجميع