السلام عليكم ورحمة الله وبركاته
اخواني وابناء عمومتي الكرام
احب ان اطرح بين ايديكم اول مشاركه لي بينكم
وهي عباره عن قصيده اتمنى ان تنال جزء بسيط من استحسانكم
والله الله بالانتقاد تراي ماحب المجامله
اترككم معها
سقاك الله ياوقت(ن) مضالي=وانا قلبي من الهوجاس خالي
اغني كل يوم وكل ليله=وألحنها على الطرق الهلالي
اغني للبعيد وللقريب=وأسليهم وأنا داله وسالي
حسبت الوقت دايم مبتسم لي=ولا فكرت في غدر الليالي
غدرني وقتي الشين ولعبي=مع اللي حبهم بالقلب كالي
وغدرني في الصديق وفي القرابه=وغدرني في الرفيق اللي موالي
هموم(ن) مع مرور الوقت تكبر=وأنا ألها من طحاطيح الرجالي
اعاندها وأجاهدها وأكابر=تقول الهم مايطري ببالي
تعلمت اكتم همومي بقلبي=وأعلمها بعد موتي عيالي
اشيل الهم واصبر واتحمل=كثر ماشالت ظهور الجمالي
وأذا ضاق الفضاء في وسط عيني=تنحرت الرجوم وكل عالي
بديت بروسها من حر ماأونس=وأقول بخاطري واهملالي
ولامني بديت براس رجمي=طلبت الله والي كل والي
وفاضت عبرتي من وسط عيني=ليا منه طرالي ماطرالي
وهمي ماشكيته غير لله=وغير الله ماأشكي ماجرالي
هو اللي يفرج الهم ويزيله=مغير حالة عباده بحالي
سعد المسعودي