[معجب العتيبي]

البواردي

مرحبا ترحيب راقي وعالـي مستـواه=يشمل اهل العرف ويخص ابن ثعلي علي
اكثر الغيّاب يرجـع وجيبـه قـد مـلاه=الغنايم يالمطاريـش, والمخـرج ملـي

الفالح

البقا بالشاعر اللي يرحبّ بزمـلاه=شاعرٍ لو جيت ابا اوصّفه ماله حلي
يالعتيبي من يدوّر على شيٍ لقـاه=كان في خاطرك علمٍ تريده قول لي

البواردي

ودي ان الحر الاشقر يحلق في سماه=دام له ريش ومخالب وحظه معتلـي
الفتاوي يابيض الوجه فيدين القضاه=دارسين المذهب الشافعي والحنبلـي

الفالح

كل شي بحتنه وكل علمٍ في سـراه=اصبر اصبر يامحمد ولاتستعجلـي
بيض الله وجه من حدّر الدلو وملاه=دلوه ايدلّيه فاضي ويطلـع ممتلـي

البواردي

خابرًهداج من جاه مـا يشكـي ضمـاه=مار تال الوقت عـذب مواويـح الدلـي
يالهواوي كان منوتك في ريـم الفـلاه=سوق فيها المهر واتعب على جمع الحلي

الفالح

ما انته اول واحد اسمع منه علمك هذاه=واختصار العلم يا صاحبي فيمـا يلـي
المهر حاضر وموجود يا مـال الغنـاه=مار ابا اول شي احافظ على مستقبلي

البواردي

اثرك تحاوص عن الموت وتحب الحيـاه=ناير بعمرك عن (الحق؟) في وسط الخلي
لو بنيت بروج ياعلي في راس السـراه=ما نجيت من الصوادف وتقديـر الولـي

الفالح

من مشى درب الخطر ما مشى درب النجاه=ينتحر..... والله يدخلـه نـارٍ تصطلـي
ما انتخبط يا ولد روق فـي كـلّ اتجـاه=ثمّ نبلش مع جهينـه ونبلـش مـع بلـي

البواردي

المغامر فاز بالسيف واخلص في هواه=ياصل الحروه ومثـل الذيابـه يهذلـي
والحريص يبات لو كان ما حصّل عشاه=ما قدر ياخذ من القوم لو حتـى طلـي

الفالح

من سمعك يقول كل الغنايم في يـداه=وانت في منزلك وسهيل عال المنزلي
الملامه ماتجي حول من يكعم عـداه=واجد علومك وانا من علومك ما عليّ

البواردي

ما سمعنا لاهدير البعيـر ولا رغـاه=باركً فالدعب والشمس صاليته صلي
شايفين الاعزل اللي مناحر للرمـاه=مار ما نبغاه (من طيب ساسه) يقتلي

الفالح

البلا فالاجرب اللي عرفنا وش دواه=الدوى معروف يطلاه ابن ثعلي طلي
ما عليّه من زعل صاحبي ولاّ رضاه=ادري انّه من كلامي يضيق ويزعلي