لعيونك ياسارح البال
سلطان الجذع
سلام من الضمير اللي هجوسه ترضي الاذواق =عدد ماحن رعاد المزون ولاح بارقها
والا يابواردي حول السنه بندقك فالمعلاق =مااخبر بوارديٍ بندقه دايم معلقها
البواردي
هلا يا مـــــرحبا من هاجسّ للطيّبة سباق=عدد بعد المغارب فالبسيطة عن مشارقها
اعلقها ليا شح الزمان وبارت الاســــواق=واذابانت فلول الصيد رغبتها تحققها
سلطان الجذع
أخذت من الليالي تجربه بلغت بي الافاق =الاذن اكذب اللي تسمعه ..والعين اصدقها
ترى ماضاقت الدنيا ..ترى ماقلت الارزاق =ولكن العشاقه مايجيها غير عاشقها
البواردي
ليا اوحيت الرعود المدوية لا تسبرالبرّاق=عسى الله يرحم الاجواد ويسلّم صنادقها
ترى قيس الملوح يالعتيبي سيد العشاق=وليلى تسبقه في وصلها قدام يسبقها
سلطان الجذع
ترى مايتبع أفراح اللقاء الا دمعتين فراق =هذا وقتك ..مثل مايجمع العالم يفرقّها
تعلمني بمجنون دخل غيبوبته مافاق =انا اللي بالذهب والماس واللولو مطوقها
البواردي
مدام ذياب غانم ما نقض فالعهد والميثاق=مشاريه العرب ما تلحقه مهما تلفقها
ظلمت العاشق اللي في عيون اهل الوفا عملاق=واذا عندك دلايل يا وسيع العرف وثقها
سلطان الجذع
انا بقول غرر به نزيف الحبر فالاوراق =رسمنا له على الواقع خطط بالعكس طبقها
ترى في عالم العشاق يعطى فالوثاق عناق =ورى قيسك مفارقها ودمع العين مغرقها
البواردي
تخطط يالمعاون والقضية في يد السواق=يقود المركبه والله على السكه موفقها
لك الله ما تركها في غيابه رهن للاشوق=لكن القوم تسعى بينهم والحسد حارقها