[ابو غصين]

سبحان محي الارض من بعد موتها =ولولا العنايه كان ماخضر عودها
حنت عليها المرزمات الغوادي= يرجع بها المسني ليا اوحى رعودها
كن البرد حول الحصى حين ينتثر= جوهر عذارى نثرت من عقودها
غدرانها سفاح تزهى رياضها =ريح العوالي في المحاني تذودها
تغرد بها الاطيار من كل ناحيه =من الطرب حدارها وسنودها
تلعب بها الاشواق حتى تجاوبت= واسترسلت من شوقها مجهودها
وجاوبتها بالصوت ماني بعاشق= لكن افكار الضماير تعودها
ان جيت ابا اقهرها تضايق بها الحشا= وان جيت اناحيها تزايد ورودها
كنيتها في خاطري واتعبتني= ولاتختفي دعوى تبين شهودها
تسعى لنا الدنيا وتطوي عمارنا= وبيض الليالي ماتعلم بسودها
عزوم ٍليا قفت غرورٍ ليا اقبلت= مكارةٍ بواقةٍ في عهودها
ان جيت احاربها واحارب نعيمها= روحي تباها والاماني تقودها
وان قلت اجد السير اباها تعذرت= وهي نومست ناسٍ هتيله زنودها
تنومس هتيل حربته لابن عمه= دايم مولمها وراكز عمودها
دايم مولمها ويطعن بها القفا =والطيبه من خلقته ما يفودها
وعزي لقومٍ ينزل البغض بينهم =بالتفرقه والبغض تشمت حسودها
ومن عرض اقرابه لعوج الطلايب= يذهب معزتها ويكثر زهودها
ويقطع هبيلٍ حكمته عند حرمته =يبدي لها سده وتبدي سدودها
على بساط البحث بينه وبينها =يبدع لها كلمه وياخذ ردودها
حتى ايش لو كانت حياته طويله= عسى حفرته في سرع تطوى لحودها
وترى تفاصيل الرياجيل واجد =يتعب مغنين المثايل عدودها
عرفت لي منها معاني كثيره= خابر ثعالبها وخابر فهودها
ترى الثعالب ما تغير عيالها =لو كان تنقش بالزمرد جلودها
والحر الاشقر ما سكن فوق عرفجه= لو كان مالت بالثماري فنودها
ومن لاتنقى في المناسب تندم =وروح الفتى تزهيدها ما يزودها
واناعتيبي من سلالة هوازن= ربعي عوايدها الفخر من جدودها
ما نوشي الفتنه ولا نحرث الردى =ولا نهاب اليا تسامت وقودها
ان ميل الميزان من قوم يمنا= صبرنا لها لوكان كبرت لهودها
وان ميل الميزان منا على العدا =نروي من السم السقطري كبودها
رسمنا الثلاث البيض في الجاهليه= واقرها الاسلام واثبت حدودها
من لاومن جاره فلا هو بمؤمن =واهل الشرف للجار تبذل جهودها
ومن لا اكرم اضيفان ما هو بمؤمن= واهل الكرم جادت على قيس جودها
ومن لا يعدي عن خويه بسيفه= خساره على سبلاه تسكن خدودها
ساهمت باابيات الشعر في محلها= مع جملة الشعار لا جت وفودها
نفخر باصالتنا و يفخر مليكنا =تحت راية التوحيد ثابت وجودها
ملكنا امام الشعب قايد جيوشه= فيصل سعدها في ليالي سعودها
واخوانه الاحرار نصره على العدا =نمورٍ يقهر كل طاغي صمودها
والمملكة من غربها لين شرقها= ان حك حيدٍ حيد حنا جنودها
اموالنا وارواحنا فدوة لها =نسخى بها لسهالها واحيودها
ويحرم عليها ما تزين لغيرنا= لو غطرفت بقعا وساقت قعودها
تمت وصلى الله على خيرة الملا= اللي هدى الكونين بامر معبودها