[بدون نك]

للشاعر محمد الدحيمي الشهري ( اخو تكفى )

علم العفا وعفاك .. يا وافي الكيـل = ببساطه أبشّرك .. في خيـر وعفـا
نكفي بعضنا ,, وانتكافا على الشيل = واللي تعب من الحطّ والشيل يكفـا
من ذاق حرّ القايله يعشـق الليـل = ومن شبّ ضّوه ليلة البرد .. يدفـا
لاعاد ليلٍٍ نمت به في حرى سهيـل = وخايلت نوضٍٍ يخطف العين خطفـا
امسيت من جيل ٍ ولاهوب ذا جيل = واصبحت ... والاّ ديرتي شبه منفـا
كنّا على فال الشحـم والمعاميـل = ونفوسنا انقى من نقى العدّ .. واصفا
وانا ولو راحت بقولـة : تساهيـل = صلف وصروف الوقت تحتاج صلفا
ياترج جدّاني .. زحول الرجاجيـل = يحرم فلا لي عنك ياتـرج .. مقفـا
إمّا لطمنا العيل .. والاّ الطم العيـل = مادام شبّ النار مندوب الأطفـاء
خل ابرهه الأشرم على ذمّة الفيـل = وانظر لشيٍ .... مايوصفّه وصفـا
ياذيـل والله ماتجـي راس ياذيـل = علمٍ ماهو يغبـى ولاهـوب يخفـا
واللي حمـا بيتـه بطيـرٍ ابابيـل = ماجيتـك ادوّر لمـن راح واقفـا
ولا جيتك اطلب منك بن ٍ ولا هيل = جيتك وجرح الظلم .. غاديه يشفا
جيتك بكلمة .. كنّها صعقة الويـل = إن قلت تكفا ... لا تهاون بتكفـا
تكفا .. تراها كلمةٍ تقطـم الحيـل = لا بالله الا تنسـف الحيـل نسفـا
تكفا .. ماهي لمعقبيـن الفناجيـل = تكفا لصلف وعادة القـرم صلفـا
تكفا .. ترى تكفا لها هدرة السيـل = في صدر حرّ .. ينتف الطيب نتفـا
تكفا .. ترى تكفا لها تسرج الخيـل = إن كان لك باالخيل سرج ٍ و عسفا
تكفا .. تبيّن كـلّ لاشٍ وحلحيـل = تسمع لها بالصـدر هبـدٍ ورجفـا
تكفا .. وتكفا ماتسـاق لمهابيـل = تكفا .. تخلي القـرم لاشٍ وهطفـا
تكفا .. تجنّبني هل القـال والقيـل = مانيب من ينكف على كـل ملفـا
تكفا .. تراني من قروم ٍ مشاكيـل = حمّاية الساقـه .. بسيـفٍ وشلفـا
تكفى ترا تكفـى تهـز الرجاجيـل = ولولا صروف الوقت ما قلت تكفى
ما قلت تكفى غير من فترة الحيـل = وانته ولد من يفعل الطيب تكفـى
انخاك من كثـر العنـا والبهاذيـل = الفقر حطمني .. وانا ازريت تكفـى
غديت مثل اللي برك ضامه الشيـل = تضحك بي ضعوف الرجاجيل تكفى
يومٍ لك وقفه .. وجاه .. ومداخيل = ما غنتني عن مثل شـرواك تكفـى
افزع ترا وقتي غدى كنـه الليـل = والعلم ما يخفـاك يالقـرم تكفـى
ما عاد بي شده ولا عاد بـي حيـل = ضدتني الايام ... والقـلّ تكفـى
اروح وارجع ما حصلي محاصيـل = والرجل بادت .. يا فتى الجود تكفى
واليوم عندك يا رفيـق المشاكيـل = العذر ما ينفع وانـا قـول تكفـى
حيثك من اهل الطيب واهل المفاعيل = يا زبن من جاله ومن قـال تكفـى
الجيب فاضي .. واليالـي مقابيـل = عجزت اعيش مع الرجاجيل تكفى
والراتب المحدود .. يـروح تحويـل = من الاداره .. لاهل الديـن تكفـى
حتى عيالي ما قدرت الهـم الكيـل = والازمه لا جات .. صديت تكفـى
ارجى الفرج والله يجيب التساهيـل = واعيش في راحه مع الناس تكفـى
والله كريم .. يبدل الحـال تبديـل = وما قلّ دلّ .. وصامل الهرج تكفى

تحياتي للجميع ،،،