[الكايـد]

كل عام والوطن بخير كل عام والهيلا بخير

القصيده هذي للشاعر سلطان بن غزاي الثبيتي العتيبي اتمنى ان ان اكون نقلتها سالمة من الاخطاء

بسم الإلـــه الــهــادي الرحـمـاني=الخـالــق الــرازق عــظيم الشأنـي
جـل جـــلال المعتـلي في كــونه=رب العباد المعطي المناني
من يذكر الله في حياته رابح=ترديد ذكره يخزي الشيطاني
وبعد الذكر لحظات لدوا يمي= تسمعــــوا فــي شــــــرد القــيــفــاني
من غير قطع لوارد المتحدث=من وقتكم نبيي عشر ثواني
ابـا اتـمـثل فـــي زيــــان عـتـيـــــبه=الملتقى اللي يجمع العتباني
المحفل اللي ضم كل الهيلا=من بحر جده لا محيط عماني
في ظل عبدالله ملكنا الغالي=صقر العروبة مرعب العدواني
والمبتسم ريف اليتامى القصر =ولي عهد المملكة سلطاني
وعضود عبدالله عيال معزي= أولاد مقرن سلسلة مرخاني
الشجرة اللي نستظل بظلها=من الجنوب لوادي السرحاني
والله يعز اللي رفع سهم البل=مشعل ولد من وحد البلداني
مشعل ولد عبدالعزيز الفيصلي= عوق الخصيم ومغني الفقراني
حط المزاين ودعمه من ماله=باكبر جوايز لأفضل الالواني
على مدار العام في أم رقيبه=للشعب مفـتوحـه وللــجيـراني
للمملكة وأهل الخليج أخوانهم =مشاركة فردي وللذيداني
باسم المؤسس جايزته الكبرى=تحمل مسمى مسس البنياني
وجوايز باسم الملك عبدالله=تصرف لملاك الأبل مجاني
قولوا معي لله درك مشعل = كفه معوده على الاحساني
والبل بعد دعم الأمير وماقفه= لها ظهر صيت مثل ماكاني
وأسعارهاوصلت لأعلى مستوى= وصارت تباع بغالي الأثماني
والبل ذكرها الله بمحكم قوله= وفي خلقها قال اعتبر ي انساني
والها بوسط قلوبنا مكانه=اليوم والا فايت الازماني
في مامضى عنها نصد الغاره= ونفتكها في ساحة الميداني
لقالوا البل ياعتابه باعه=نارد عليها مارد العطشاني
لو دونها بارق وخيل ومركي=نردها ونجندل الفرساني
ونرعابها قفر بكور وسمه=حنا جنبها والعدو منهاني
عاديل القصر وسفن الصحراء=من لاقناها خايب وخسراني
واليوم نكرمها ونتبع شفها =تمشي من السوده إلى الودياني
مقياضها وادي الرشا والعبله=ومرباعها النفود والصماني
وضح ليا طق اللبيد الراعي=وقام يحدا ويكوسر الالحاني
ضفت على القعده يشوق لونها=ماكنها الا المزن في الرباني
جرد الرقاب ظهوره متفهقه=رثم الخشوم ومرق اللحياني
وشعل غواربها سناد ونسع=فيها سطر لاجراسها دنداني
وصفر مثل طابورعسكر فرقه = لاروحت تبرالها الحيراني
وسود مثل لون الظلام الدامس= فيها غبوق الجار والضيفاني
معنا ومع كل القبايل مثلها =ومن لا يمجد لابته غلطاني
قبيلتي يوم كل يفـخر=أنا افتخر بعتيبه الشجعاني
الآبة اللي فعلها يشهد له=لاثار في جو السماء دخاني
ذباحت الحايل كعام العايل=هذا اسمنا السايد مع العرباني
في نجد نعرف من قديم وحاضر=بني سعد والساس من عدناني
والانا عنوة مع نبي الآمة=محمد اللي فسر القرآني
صلواعليه عداد ذعذاع الهواء=وماغاب نجم في سماه وباني

الشاعر : سلطان بن غزاي الثبيتي العتيبي