[شبيب شافي الملعبي]

أنا عطيتك كامل الحب يوم أنت = ما أعطيتني غير العنا وأندلاجة
ياكثر ما أعطيتك ولامنك عينت = غير التعب والهم في كل حاجة
عشمتني في نيل حبك وهونت = وأقفيت ياللي صار همي مزاجة
حسبي عليك من الحنايا تمكنت = وجرحتني جرح صعيبن علاجة
بالهم والتعزير فيني تفننت = وخليت في عمري تبين العواجة
قصرت عمري في فراقك وبينت = أنك تبي تاخذ من الراس تاجة
بغيت حقراني بفعلك ودونت = وغزيتني غزو أعشوي للخواجة
هقيتني سهلن تهينة ولاهنت = وردت من بيرن شحيح هماجة
ودارت بك الافلاك من بعد مازنت = وخسرتني يارافعن في حجاجة
ليتك بغيت الصد بالهون وأعلنت = وأعطيت قلبي من هوالك أنفراجة
ماكان لاعانيت صدك ولاكنت = أترك ربيع الوقت وأتبع عجاجة
غلطان أنا اللي في غرامك تهاونت = وأعطيتك المطلوب يوم نتواجة
دليل غلطاتي معك يوم ماخنت = وعزرت في قلبي وزدت أنزعاجة
ليتك رحلت ولاعلى ضامري منت = ولاسقتني في سكة الانعراجة
أنا أشهد أني من تصاريفك أمنت = أن العطا هالوقت يصعب نتاجة