علمن وكاد وسابقة حلف وشهود =وفوقة من الدعوى عهود وبراهين
أن قدر اللي باسط سبعة اوتود= اللي خلقنا من صلاصل ومن طين
لا أقطع وصال اللي تردا عن الجود= وأعز نفسي عن عيال الشياطين
قلتة وانا ما أوحيت عاذل ومنقود =ولا أخذت بالدنيا صعوط المجانين
عاقل وأميز قيمة النقص والزود =أجي النشاما وأتخطا الرديين
غضيت عن قولة عمى دون مقصود= وجربت زلات الرجال القريبين
وسمعت حكي سعود لاغاب مسعود= بوقتن تشع بة النمايم دواوين
هذا زمن نقاضت العهد والكود= بعض النفوس اللي تبور الموالين
راعي الردية بالردا صار محسود= يسبق على فعل الردية ملايين
لاجيتهم قدرك فلا هوب محمود= كبودهم لك نازراتن ملاعين
ولاصرت في مجلاسهم منت موجود= مايسالون أفلان وين ومشا وين
فرقاك يفرحهم ولاصرت مضهود =محدن يبادلك أضتهادك من البين
واليا بغوا المصلوح هجولك حشود= ياكثرهم عندك ليا أحتاجوا الدين
وأن قل مالك عشرتك مابها فود =مثل العروش اللي خذتها السلاطين
ولونك تسايرهم على المدح والهود =ذموك والا قالوا أفلان مسكين
مير الليال البيض تفرق عن السود =والوقت فيه الزين فايق عن الشين
بعض الرجال أوصالها درع مسنود= تذكرك بالمعروف لو مرت سنين
تدمح خطا الصاحب ولو كان معيود= تعرف معفتها من الوجة وتبين
تفزع معك للضيم لاصرت محدود =لا أحتجتهم بالمال مدولك أيدين
مايحرجك بالدين والوصل ممدود =ماطق بابك عقب ما أعطى بيومين
مالة مثل مالك وملفاه محصود= لاطحت شالك بالمعزة وباللين
ينشد عن احوالك ويقطع لك حدود= لوتطلبة بالحال ما قال بعدين
يشرك افراحك من الورع للعود= يحزنة لاصابك دعات العدويين
عونك ولك محزم ومسند وبارود =لاضقت ضاق وشرهتة تسعد العين
يحتار لامن شاف ناظرك معقود= يعطيك مايحسب عطاياه لك دين
يطم عنك لسان ناقد ومقرود= يفزلك فزة خيار الشياهين
هذا الرفيق اللي على هبت النود =تختار ريضانة مابين المقاطين
والطيب لاهل الطيب مفهوم وعهود =تاج على روس الرجال العفيفين
والا الردا بيتن مطرف ومهدود =ياعل من يبنيه يعطى عمى العين
صح لسانك