[نامي]

سمعت لي علمٍ محمد زعيمه = يقول رد العلم عني فالأعلام
يابن صنت راعي العلوم الذميمه = أخذت بالغيبه على الغوج مجهام
ياالحربي اللي مرجلتك النميمه = ويش تستفيد الا الفضيحه والأثـام
جمعت مع ذنب النميمه ظليمه = مهنتك ممقوته من الخاص والعام
ترى الظليمه عاقبتها وخيمه = وتحريمها مذكور في دين الإسلام
لكن مايدري خطات البهيمه = على هوى نفسه يسيرن الأقدام
عنده بصرمير البصيره سقيمه = عبد ٍ ينام وخالق العبد مانام
وانته خذيت من الخطايا قسيمه = ويمكن تطور بعد الأيام الأقسام
أدخلت راسك في حبال الشكيمه = ولبست لك ثوبٍ بلا جيب واكمام
تذكر رفايد حرب عندي ظخيمه = وقافيك تأكيد الخبر يابو عرام
مازرت حرب اقصد وراهم غنيمه = لكن ضيف ومستجيبٍ لعزام
سبب مراحي مستجيب لعزيمه = لاني بلاهاكع ولاني بمنظام
ضيفٍ عزيز وفي معزه وشيمه = عند الرجال اللي مواردهم اجسام
وقاموا مقامٍ وافي ٍ من يقيمه = قاموا بماجوب الضيافه والإكرام
حلو البشاشه مع جزيل الوليمه = وكل ٍ يقول الضيف عندي إذا قام
مقامهم مافيه نقص وثليمه = والهم عليّ ان زاروا الواجب التام
وطلبت من رجل ٍ يمد الجسيمه = حاجه وارجعها بعد عدة أيام
ونهض وقدمها بيمنى(ن) كريمه = ورجعتها لعبيد ماغلق العام
عبيد ابن زايد قوي العزيمه = رجل ٍ على نطح المواجيب جزام
ومشيت منهم والنوايا سليمه = كل ٍ يودع صاحبه بالتبسام
وجتنا الرسايل من رجال ٍ غشيمه = مسجله وسط شرطان الا فلام
من الرجال اللي حججهم عقيمه = على التهجس والتلمس والأوهام
واحترت مابين الشقيق وخصيمه = ويصعب علي حل موضوع الأخصام
وجاوبتهم برسالة ٍ مستقيمه = وظحت فيها كل موقف بالأرقام
وقاموا بهجمه في نظرهم عظيمه = قاموا وحطوا داخل الزبده عظام
وقالوا وقلنا في العلوم القديمه = عن من دخل في وسط سرداب الإرغام
وياشين من عقب الهجوم الهزيمه = كل ٍيحاول يدفع الغوج قدام
وسقنا العدد لين العدد وصل تيمه = ماباقي الا نوصل الموقف الهام
وجتنا الأوامر من رجال ٍ حكيمه = أمر ٍ صريح وتحت توقيع صطام
وعقب تبلغنا بنص تعميمه = قمنا بتوقيع القلم قبل الإبهام
نبغى التخلص من غريم وغريمه = ونقضي على الفتنه تماماً بالإعدام
وبقت حزازات ٍ بلأنفس مقيمه = وانته وصلت ليا طرف حقل الألغام
تبغى تقومها وهي قبل نيمه = ولا انته مقاومها ليا قام من قام
يوم ان في صدرك ظمايا محيمه = وين انت يوم مقارعة روس الأقلام
ماصار لك مع قومك العام قيمه = سويت مثل اللي تغيب عن الزام
ربضت مثل اللي ربض في الهشيمه = لا جيت فراع ٍ ولا جيت حشام
إن طعتني جود وسيع الخريمه = قبل يجيك الميسم الحامي السام
اللي سواتك يطعنه في صميمه = العلم جاك وكل موقف له احكام
والأمن جعل الله علينا يديمه = ويحما الوطن من كل واشي ونمام