[*النجـــــم*]

• عسى السحاب اللّي عصير مراديف
• اشوفها في مشرق الشمس عني

• لماي برقه مثل لمي الخطاطيف
• لكن مااسمع صوت رعده يدن

• يسقيك يا ذيك الجبال المشاريف
• الّي هواها يبري الوجد مني

• ويسوقها الرحمن لأرض المراغيف
• لين الحيا في نجـد يصبح مثنـي

• هذيك صعبات وهذى مواليف
• وهذيك ترزم والحوير يحن

• وهذيك خلفات ترازم معاطيف
• حلاّبهن في شدته ما يوني

• ليا اقبلن بالعصر مثل الصفاصيف
• يجلن هما بالحشا مستكن

• وان عسمن يجي لهن زفازيف
• ظلت قدور العطف غيظ وتثني

• دارت زباد الخير فوق المعاريف
• ظلى الزبد فوق الزبادي مبني

• وصوت النجر جاله عويل وغطاريف
• كسر سكون الليل ما يرجهن

• والضو شب يماحشونه طفاطيف
• والكيف مخلوط بهيل وبن

• ودارت علوم مصرفات تصاريف
• شي أستمعه وشي مذكور مني

• بالديره الّي تكرم الجار والضيف
• أهل الشريعة مذهب القوم سني

• ذباحة الأكباش حمالة السيف
• حماية الاوطان من كل جن

• ما جالهم بالغي والله تصانيف
• علم وكاد ما تخيله ظني

• ولا حرفوا بالدين اقل تحريف
• ولا غيروا بالخلق مقدار بن

• الله يحمى ديرتي من الصواريف
• ويعزها بالحق ماني متجني

• ويبعد الانذال قوم ملاقيف
• أهل الردا من كل مذهب يدني

• رديت من بالي لبالي محاريف
• بالقاهرة وأنا لحالي أغني

• ويا علها راقت لغيري التواصيف
• والا أنا ماني غشيم بفني

• أقلب الهوجاس مابه تحاسيف
• الا الخواطر جات وابها ارن

• بالقاهرة ما احتاج عمدة وتعريف
• معي جوازي وكل مصري يهني

• عسى السحاب الّلي عصير مراديف
• اشوفها في مشرق الشمس عني

• تسقيك يا ذيك الجبال المشاريف
• اللّي هواها يبري الوجد مني

آخر تعديل *النجـــــم* يوم 22-Aug-2007 في 05:02 PM.