[هلال الدوادمي]

في حبيبنا محمد صلى الله عليه وسلم

تبت يدا من سـب خيـر البريـه=وتبت يدا ناس ٍ عنه مـا يـذودون
يـا امـة الاسـلام يـا محمديـه=يا اللي لعفو الله وعطفـه ترجّـون
ان كان ما قمتـوا بنصـرة نبيـه=مدري متى بالله عليكـم تقومـون
من يوم لحقـت بالرسـول الاذيـه=يا مّة محمد بعدهـا وش تحـرون
انخى هل التوحيد واهـل الحميـه=للي بشـرع الله ودينـه يدينـون
اهـل العقيـده والعـزوم القويـه=اللي بوقـت النـازلات يتحامـون
ما هيـب مـن حميـة الجاهليـه=ولا حميـة عنصريـه وقـانـون
حمـيـةٍ فالـديـن عقـايـديـه=بنيت على مبدا واساسات وركـون
مـا هيـب حزبيـه ولا مذهبيـه=وتعصب ٍ فالدين ما هوب مسنـون
وحميـة الاحـزاب والطايفـيـه=مآلها تصيـر مـن دون فـي دون
وحمية اصحـاب القلـوب التقيـه=سياج دون حدود الاسلام وحصون
اليا تحاموا ضـد راعـي خطيـه=النصر من رب الثقليـن مضمـون
اقفـوا بوجـه الهجمـه البربريـه=وذودوا عن الهادي بما تستطيعـون
كل ٍ يقف منكـم لهـم فـي نحيـه=لا ياصلون المطلب اللي يريـدون
اسقوا عدا الاسـلام كـاس المنيـه=وكيلو لهم ضعف الذي له يكيلـون
ياجب على جميع راعـي رعيـه=ياقف بوجه اللـي لدينـه يكيـدون
وعلاقتـه بالـدولـه الاجنبـيـه=اللي تسيء للي بهديه مـلا الكـون
يصدر على الـوزاره الخارجيـه=تجذها من جذرها جـذ عرجـون
ويصدر علـى الـوزاره الداخليـه=تعاقب اللي فـي سلعهـا يبيعـون
ووزارة اعلامـه تبنـا القضيـه=وتبث ضد الادعـا اللـي يبثـون
والصحـف والكتّـاب والاولويـه=للي ليـا قالـوا مقالـه يجيـدون
ويترجمـون السيـره الهاشمـيـه=لابن هشام وصاحبه ليـن يـدرون
باخلاق وافعال الرسـول الزكيـه=اللي عن الزلات والنقص مصيون
قبلـه نعيـش بليلـةٍ خرمسـيـه=ما ينسري فيها الدلايـل يتيهـون
وقفى الظلام وجا الفرج مع مجيـه=والتايهيـن بمشعـلـه يستـدلـون
بعثـه ربـه رحـمـة للبـريـه=ويشفع للامه يوم بالحشـر يقفـون
اكبـر شـرف للامـه اليعربيـه=انه بعث منهم مصـدق ومامـون
نفس ٍ تجنب عـن طريقـه شقيـه=ويا سعد ناس ٍ مع طريقه يسيرون
ومـا نشـر بالصحافـه العالميـه=اخر كوايا بين الاضلاع وطعـون
وغير الطعون اخر جروح ٍ خفيـه=وادما قلوب اللـي لحبـه يكنـون
ويضحك من الاخبار شـر البليـه=اوحيت وانتم عبر الاعلام توحـون
ما خلوا من القبـح والسـب شيـه=وبعد هذا كله للاصـلاح يدعـون
وزيرهـم يقـول نهـدي هـديـه=وحمام سلام ٍ مع اغصان زيتـون
حنا عـن المنهـج جنحنـا شويـه=من ما جعل حزب الصليب يتجرون
لو نرجـع لسيـرة سلفنـا النقيـه=عدواننـا منـا بغـل ٍ يمـوتـون
لـو نستعيـد امجادنـا الاولـيـه=دفع لنا هامـان جزيـه وفرعـون
وما مالت ازهـار الربيـع النديـه=صلوا على المبعوث يا اللي تصلون

راحـت ايـام السعـاده و الهنـا قفـا وقفـا حـلـه=ليت لو ساعه تعود من السعـاده و الزمـان الماضـي
ذكر الايـام الخوالـي و الاهـل و الربـع و الاخلـه=انجض صخاف الضماير و المعاليق الغضاض انجاضي
ذكرهـا محتلنـي مثـل احتـلال القبـلـه المحتـلـه=و قاطع علي صك ٍ مثل صك الحكـم عنـد القاضـي
وقتي اعطاني بتـال العمـر لغـز مـا قـدرت احلـه=صرت افكر فيه فالمصفـار و المربـاع و المقياضـي
واهني اللي يشوف ان الزمـان المنتكـس صـافٍ لـه=البليد اللـي جنوبـه و الفرايـد و الدفـوف عراضـي
مثل وصف الثور الانبط ما يلاحظ فـي زمـان خلـه=يعجبك جرمه و يـوم تجربـه تلقـاه جـرم فاضـي
و مرهف الاحساس ما يجري من احداث الدهر يفطن له=ولا تحصل في زمنا اليوم رجل عـن زمانـه راضـي
يا زمان ٍ باخـره صـاروا عزيزيـن النفـوس اذلـه=ومجدهم صارت صروحه من غرابيل الزمان انقاضـي
صار منهم راعـي الغـل القديـم اليـوم يشفـي غلـه=واقفٍ فالقيض قـدم القـوم بالمشعـاب دون الحاضـي
بعد ما جاد الصميل اشتـال محصولـه وزبـده كلـه=والتعب والسهـر و الغربـال للحـلاب و الخضاضـي
غازي بن دخيل الله الرويس -ابن عون-

واهنيك فـي حياتـك بلهنـا يالورقـا=واهنيك تلعبيـن السامـري مسـروره
واهنيك ماانكـوا قلبـك بنـار الفرقـا=ولا حنى الهجران حالك حنية الباكـوره
ولا غرق خدك وكمك من هميل الزرقا=ولا انتبهتي هو دليل من الكرى مذعوره
ولا سرابك هاجس الخلان غرب ٍ وشرقا=من هزيع الليل لين الصبح يبدي نـوره
مثل من دنيـاه بالحيلـه درقتـه درقـا=من كثر غاراتهـا ضـده تهشـم زوره
فالنحر فرسانهـا دايـم طعنهـم زرقـا=وصار جيشه منهزم وجيوشها منصوره
ما بلايه من هوى خطو العنود الطرقـا=لو تبيـن قدمـي المكيـاج و الحمـوره
حالي اللي ضرها واللي سرقهـا سرقـا=شوف دار كانـت بسكانهـا معمـوره
يوم ادوج في ربوع اوطان روق وبرقا=شوفها يوحش بعـد سكانهـا مهجـوره
منهم اللي هاجروا بديار حضر الورقـا=ومنهم اللي في ثراها اجسادهم مقبـوره
ما بقي في مرحهم غير الشنون الحرقـا=و الاثاثي والرحا والبرمـه المكسـوره
كل ما اشتاق لمباديهـا المنيفـه وارقـا=قام فلم الذاكره قدمـي يعيـد الصـوره
وانزل وجيبي وكمي من دموعي غرقـا=ولو تعل العين الارض بدمعها معـذوره
ليت ذكرا ًذكرها في وسط جوفي عرقـا=تنمحي مثل الطباشيـره مـن السبـوره
ليت جرحي بالعـلاج وبالقرايـه يرقـا=مير جرحي متعب ٍ يحتار بـه دكتـوره
غازي بن دخيل الله الرويس -ابن عون-

..
..
..
..

الى قصائد جديده باذن الله