[مخلف الهقاوي]

السلام عليكم ورحمة الله وبركاته

اضع بين ايديكم هذه الابيات عسى ان ترتقي لمستوى ذائقتكم

صحيح ان العفو عند المقدره=صحيح من حقّك عليّه اسمعك
لكن خطاك اكبر من اني اغفره=ان كان يالظالم دماري مطمعك
تخطي عليّه والخطا منك استره=حرصٍ على سترك واخاف اضيّعك
لولا احترامــي للوجيه المسفــره=كنت اتولّــى حضرتك واسنّعك
بعض البشر فعله مثل فعل المره=نقّال حكي ولا حضر ماينفعك
يدبل كبود الناس هرج وثرثره=وان رحت ماتامن لسانه يلسعك
يقطع زمانك يازمان السمسره=يوم الرخامه والسفه في مرتعك
دكتور يادكتور هات الدكتره=عطني علاجٍ من كتبك ومرجعك
عندي مراره والبلا متمرمره=لو شفت مافيها حرام لتفجعك
وان كان ماعندك علاج وتبصره=رح علّم المقرود يمكن يتبعك
قل ياغبي امسك زمام السيطره=واحفظ لسانك ياغبي لايصرعك
اسمع قبل كل احترامك تخسره=ان طعتني ولا زمانك يصفعك
اعطيك في رحلة حياتي تذكره=سافر تعلّم خلّها هي منبعك
واذكّرك وقتٍ مضى ماتنكره=يومنّ في لحظة شتاتي اجمعك
واليوم ياعصفور من فوق شجره=اذهن من زقوم الصقور تقطّعك
مادام لــي ربٍ كريمٍ اشكـره=ماهمني منهو معي او من معك
ان قلت لي: عفوّك اقول: المعذره=وان قلت لي:آسف.ترى مااسمعك

آخر تعديل مخلف الهقاوي يوم 01-Aug-2007 في 07:12 PM.