[عبدالله بن جازي بن هدي]

الاخوان الاعزاء سوف اورد لكم القصيده كامله
روايه عن عمي الشيخ::صغير بن هدي العياضي الحربي واللتي قالها عمي الشيخ::معلث بن هدي العياضي الحربي //
===================================
يقول معلث واق حيد زمومي= في مرقب عسر على النذل مبداه
حبر الغرابة من طوال الرجومي=واهني من لاجا الغرابة هنياه
ياطارش لعبيد عطه العلومي=ليته تحلى اللي عيوني تحلاه
اشوف قطعان سوات الغيومي=وبيوتهم مثل الكراب المبناه
وقالوا على الله شافو السبر يومي=والسبر غار وقدمه السوء لاقاه
وشاروا وكبوا كل راي معدومي=وقالوا على البل ماعن البل مجاجاه
ومالوا عجول معقدين الكمومي=والكل منهم زابنن كور وجناه
ونعم بساري يوم جات اللزومي=بيديه مير يصمل القوم برياه
ويثني معلّث جعل حظه يقومي =ونحمد اللي من هكاليوم نجاه
عقب حجروه مقطعين السلومي=جابه خليوي عسى المنايا تعداه
وحنا ذبحنا كل قباً عزومي=وابن حمد مرذي على القوم وجناه
وابن منيره فوقهن محزومي=غير اربعة والخامس اللي دفناه
وسبعه من العيرات طش السهومي =والثامنه صفرا حمود المحذاه
ويثني الجذية شوق حان الرقومي=ترم العشا لمكسع الريش يمناه
وألاد روق يوم لحقوا لمومي=لحقو على قب المهار المغذاه
والخيل ترسي قدمنا فالحزومي=وخلافنانركى على جيش ورماه
وهمه علينا مثل طير يحومي=وحنا عليهم مثل ورد على ماه
ولفح الهنادا مثل لفح السمومي=وألا سنا نارٍ على الكير محماه
وملنا بهندٍ يلحسن الرقومي=دايم على لحس الضرايب مضراه
وكم جادلٍ غب النكايف تحومي=وتهل دمعٍ غاشي الخد واحفاه
وكم جادل غبه تقد الهدومي=وتقد جيب الثوب وتقول واخواه
ياذيب حسله ناد ذيب الجثومي=اقنب لذيب حبير واقطن على ماه
وترى خبر جارك علكم لزومي=وتخبر اللي طاري العلم ماجاه
والشيب جاله بالمفارق رسومي=واهني من لا جا الغرابة هنياه

من لديه اي استفسار او ايه اضافه مراسلتي على الخاص
اخوكم//عبدالله بن جازي بن هدي العياضي الحربي

آخر تعديل عبدالله بن جازي بن هدي يوم 08-Aug-2007 في 11:31 PM.