ماينكر المعروف غير ابن الحرام= كلمة وتلقاها معا كل بدوي
هذاك لابرد عليه ولا سلام= ماينقصه ياكود ينبح ويعوي
الله يعز إلحى الرياجيل الحشام= من كلمة ماهي تصير وتستوي
الأرض صارت عش لطيور الظلام= وابليس ماقصر والأيام تغوي
والإ أنا ماني على احسن مايرام= مبطي وانا عن من سكنها منطوي
لاصار ما لك مع هل الطاله مقام= ياقلب فجرها وياصدر احتوي
خل الدموع اللي ورى عيني تنام= تنزل على خدي وتكويني كوي
ياقلب لاتشره على بعض الكلام= ما كل خلق الله بالدرب السوي
وان ماحصلك خوة الناس الكرام= احسن لك تعيش الحياة بلاخوي