السلام عليكم ورحمة الله وبركاته
هاتفني أحد الأصدقاء وذكرني بالخرج والأيام الجميلة التي لا تنسى فيه وكتبت
هذه الأبيات التي أمل أن تنال أعجابكم :
عساك يالخرج بالهمال = عرّفتني بالشياهيني
ألابة اللي لهم مكيال = مرّجحين الموازيني
حشمه ولزمه وعرف أرجال = منهاجهم منهج الديني
والصدر هاضت به الأمثال = من كل صوب تناديني
مابين شبه وصف أدلال = وأحد النشامى يقهويني
وفنجال يسوى مية فنجال = عما يسوى يكفيني
وجنبي خويٍ كريم أسبال = من الرجال الكريميني
قوله مثبت مع الأفعال = يميز الزين والشيني
وليا أرتكى للحمل شيّال = يخوض كل المياديني
أموت ماأخاوي الأنذال = وقت اللوازم تخليني
بعض الصداقه بسعر إريال = مابين باعه وشاريني
وبعض الصداقه كنوز المال = أتزود فوق الملاييني
يابو مشاري عريب الخال = أكيد ماأنت بناسيني
ماينفع الهرج بالجوال = اليوم لازم تواتيني
بعد القطيعة يصير أوصال = أجيك وإلا تبا تجيني
سوالف معك شرحت بال = لا ضاق صدري تسليني
نبا إنتخاوى الي الشمال = فيها الحيا والمزاييني
أرض وطيه وماش إجبال = فيها النظر تطلقه عيني
أحب أنا البدو والترحال = وشوف الغنم والبعاريني
ياعيد يقهرني المنزال = وسط البلد والدكاكيني
يا الله ياعالم الأحوال = أنك على وقتي تعيني
حنا أرتبطنا بها الأعمال = وياعيد ماأحدٍ بمعفيني
*
العارف