البل عطايا الله واهلها عتيبه= من غير نقصٍ في عموم القبايل
حنا هل البل فالليالي الصعيبه= نفتكها من فوق سرد الاصايل
من دونها ضرب الفشق فالضريبه= ومن دونها نروي رهاف السلايل
نتبع هوى وضحٍ زهتها الجنيبه = يوم اكثر العربان يرعى الجوايل
نرعابها دار العدو مانهيبه= نرد الخطر بمعبسات الشمايل
وطعونا للخصم دايم عطيبه= فالوجه نضرب مانجي بالختايل
وان كبرت الدعوى وجات المصيبه= هيلا على العدوان قامت تهايل
ياما خذينا ذود ناسٍِ غصيبه= يوم القبايل والقبايل تشايل
لا من ذيب طويق دوا قنيبه= جاه العشا من كف واف الفعايل
يوم الصحيب يذم وقفة صحيبه= وقفاتنا تشف الكبود العلايل
نضرب بسيفٍ مايعالج صويبه= ونودع عدانا لا حضرنا سحايل
وهذي على العتبان ماهي غريبه= اهل الوفا والطيب واهل الجمايل
ربعي لهم عند المناعير هيبه= افخر بفعل اهل الكرم والفضايل
الابه اللي مارضو بالغليبه= الا بنصرٍ مايجيله بدايل
اقولها للي علومه عجيبه= ردعٍ لراع الكذب والشك زايل
اللي يجيب الهرج نمه وغيبه= ويحرص على جحدة فعول الحمايل
يرم الهدف لكنه ازرى يصيبه= يقول قولٍ ماله ايت دلا يل