يا الله يا منشي حقوق الخيالي= يا لواحد اللي من ترجاك ما خاب
أنت الوحيد اللي عليك اتكالي = يا محصي الآجال بكتاب وحساب
أنك تصبرنا على كل حالي = وتجبر عزانا يوم حلن الأسباب
جاني خبر ضيعت حتى السؤالي = نسيت فرض الظهر لين الشفق ماغاب
من يوم قالوا مات تالي خوالي = أونست في صدري من نار مشهاب
لا والله ألاراح راع المعالي = الطيب اللي دوم للطيب كساب
شيال صعبات الحمول الثقالي = يحسب حسابه عند ربعه والاجناب
يفزع بجاهه دونهم ما يبالي =سقم الحريب اليا أكترب حبل الانشاب
دايم وهو طرقي جنوب وشمالي = مثل المحامي دون ربعه بلا أتعاب
رجل إليا عدو زحول الرجالي = عزمه شديد وللصعيبات ما هاب
تبكي على فرقاه صفر الدلالي = ومشب نار دايم فاتح الباب
ويبكيه من حدته سواد الليالي = صكوا عليه ا عداه والدمع سكاب
يقوم من دونه بجاه ومالي = يرد حقه لو نشب بين الأنياب
لو قمت أعداد فيه كل الخصالي = عجز القلم والقاف من كثرها شاب
أعزي أخواني مع اعيال خالي = وكل القبيلة في عزيز بعد غاب
عسى العوض في طيبين العيالي =يرقون للعليا عريبين الأنساب
وعساه فالجنه بمنزال عالي = في جنه الفردوس تفتح له أبواب
برحمة المولى عزيز الجلالي =يأخذ كتابه في يمينه بلا احساب
مرثية في خالي /محمد بن عبد الله ابن عليان الحافي العتيبي
الشاعر/ فؤاد بن سعد بن خرصان الحافي العتيبي