ياهن ابن هن
ياهـن ابـن هـن مــاوالله ارداك=ومااردى نصيب اللي يسوي سواتـك
ومااردى نصيب اللي من البعد ينصاك=يبا العشا ويشوف بعـض احركاتـك
تحلق الشـارب مـن الديـن يـاذاك=ودك تخـدع المومنيـن بصـلاتـك
لكـن وش تكسـب بدينـك ودنيـاك=لا صار ترك الواجبه مـن صفاتـك
لا صار ضيـف الله تلقيـه علبـاك=باقي علومـك خشهـا فـي عباتـك
الجـود مافقّـرك والبخـل مااغنـاك=ولا تحسب انك مت من موت شاتـك
الخاتمه مـن يـوم هـاذي سوايـاك=بالله لا تعـطـي عتـابـه بنـاتـك
تكثر بنا الرديـان مثلـك وشـرواك=وتـروح تشمتنـا الرجـال بشماتـك
قصة حياتي
البارحه والناس غافيـن وهجـوع=جتنـي هجوسـي ورداً سارياتـي
والليل طال وخط الارسال مقطـوع=ياليل ياطولك متـى الصبـح ياتـي
قزرت ساعاتك على ثومـة الكـوع=مالـي نديـم الا الثـلاث الخواتـي
صفر الدلال اللي بها الهيل مشموع=باشكـال وارناقـا معـه لايقاتـي
واصبحت من كثر الهواجيس مفجوع=وافكـار قلبـي شـرداً سارحاتـي
ياسائلاً تسأل ترى الصوت مسموع=وما نشر بالصفحـه قريتـه بذاتـي
سويت لي مشروع من غير مشروع=والزمتنـي بالـرد دون شهـواتـي
اكيد عندك يا فتى الجـود موضـوع=والا مسوي بـك زمانـك سواتـي
مسقيك من علقات الايـام قرطـوع=وتسمع صراعي فيـه ومغامراتـي
فان كان هذا الامر بالشكل والنـوع=خـل الامـر لمكـون الكاينـاتـي
ساير زمانك كان لك قلب وضلـوع=وارج الفـرج بايامـك المقبـلاتـي
وان كان ما طاعتك خلك لها طـوع=ما انته بضاربهـا برمـح الزناتـي
اما سوالـك مـا جوابـه بممنـوع=ولو للحيـاه اسرارهـا الخافياتـي
اجاوبك لو ما معـي منـك منفـوع=تحب تعرف كيـف قصـة حياتـي
حياة ذيباً عايـش الفقـر والجـوع=ليلـه يبـات وليلـة مـا يبـاتـي
اعيش عيشة ذيب والراس مرفـوع=وان قلّ مالي عـزّ نفسـي غناتـي
رحلة مع الايام
رحلة مع الايام صولة وجوله=نزعة شباب وكملت عمر مخلوق
بديتها وانا بسن الطفولة=واليوم رسم الشيبفالراس من فوق
حاولت احقق شي ماني بحوله=ولاشفت للدنيا حلاوة ولاذوق
ماهوبانا الليقلت كلن يقوله=كم عاقلن قلبه من الدهر محروق
ركض مع الدنيا وتعبت ذلوله=ومثلي على درب الخطر ساقها سوق
واليوم جالس والذلول معقوله=وايا انتبه غنى من الشعر طاروق
قالوا تعلمت
قالو تعلمت قلت عناد وفراسه =اجاهد النفس والدنيا واصارعها
ودرست في مدرسه من شيبت راسه =دنيا العنا للي قضيفات مطامعها
تلميذها دايم تكتب بقرطاسه=تعطيه جملة دروس مايضيعها
والله عطانا نظر وشعورحساسه=ناخذ علوم المعرفة من مراجعها
ونساير الوقت ونقيسه بمقايسه=ونواجه النفس بالواقع ونقنعها
وترى حياة الفتى مهما قوى باسه=محفوفه بالخطر والموت تابعها
من مبتدى العمرحتى يلفظ انفاسه =يمر في مرحله تكثر زوابعها
اول حياة الفتىمشوار وعساسه=مسافه في عجاج العمر يقطعها
وثاني حياة الفتى تدريب ودراسه=تصعب ظروف الحياه وينشغل معها
وثالث حياة الفتى يرجع على ساسه=النقطه اللي بدا منها يراجعها
ياصل لسن الهرم ويضيع الطاسه=ويزحف مع الارض ويخطط شوارعها
ولياتلاقت متونه وارتخى راسه=ضاعت جميع العلوم اللي يجمعها
ياغارس الشجره بيدك الكريمه=هذا دليل إخلاصكم سر واجهار
ماهي غريبه بك شهامه وشيمه=وأبوك قبلك قد غرس خير الاشجار
عبدالعزيز اللي فعوله عظيمه=اللي جلا عنا صدا الذل والعار
وجعل لنا مابين الأقطار قيمه=مكانتن نفخر بها بين الأقطار
لولاه ماذقنا الامان ونعيمه=رحنا شرايد للفتن مثل ماصار
ولولاه سوى الجهل فينا جريمه=ولولاه ضعنا بين ماكر وغدار
قبله نعاني من حياتن سقيمه=ونهيم بالصحرا على عشرة أنفار
ناهب ومنهوبن ونصر وهزيمه=ولا نسمع المذن على وقت الاسحار
ولانعرف اللي ناخذه من وسيمه=ألا إن شيمنا تمنع الضيف والجار
هذا حصل يوم السنين القديمه=يوم الجهل يلعبنا شتى الادوار
واليوم ياخيال شقرا وريمه=نزل شدادك وادع للوالد البار
أدعوا لبوتركي قوي العزيمه=عساه مايعرض على واهج النار
اللي رسمها خطتن مستقيمه=وساروا على نهجه بعيدين الانظار
آل السعود اهل النفوس الكريمه=هم درع نجد ونجد لهل الوفا دار
لاوالله اللي نجد ماهي عقيمه=يانجد ياديرة هل المجد والكار
دمتي لنا من كل شرن سليمه=في ضل أبوفيصل عزيزين واحرار
وعبدالله اللي له مواقف عظيمه=ولي عهد اللمملكه واف الاشبار
***
سلامي على الشيخه بعد كثرة الأختام=بعد كل واحد شال ختمه وزوزابه
شيوخ الربيع اللي بعد بدت الأنعام=وراع الغنم نزل صميله ومشعابه
وقال أتقدم واسبق الناس من قدام=أجيب الختم لو مامعي ماتعشابه
ترا الشيخ من جده يخلي الجموع أقسام=ليا شن غاراتن على القوم يدعابه
وترا الشيخ من جده ليا حضروا الأخصام=يفرّج لربعه يوم ماتطلع الجابه
وترا الشيخ من جاره من الوقت ماينضام=وترا الشيخ من يفتح لضيف العشا بابه
كريم ليا قالوا يجي فالرجال إكرام=حليمن ليا ماغثرب الدهر مشرابه
كفا مامضى في ماضي الوقت والأيام=زمانن شيوخ اليوم سلموا من أسبابه
تصارع به العالم ومن طاح به ماقام=ومن يذكر الجد العريب يتعزوابه
مضى وانتهى في عهد أبةنركي الضرغام=أسد الأسود محطم الشرك واحزابه
جمع شملها من باب جده ليا الدمام=وزار الحرم قبلة نبيه وصلاّبه
عسى الله يضللنا تحت راية الإسلام=وحكم السعود أنلوذبه وان تذرابه
****
طبايع الناس من يقدر يبدلها=واهني منهو من الدنيا برد همه
ماأكثرعلوم البشر لوجيت أحللها=أعقول متخالفه واجسام ملتمه
أشخاص تربط كرمها في مشاكلها=والخير موجود والمندي على الذمه
لاشفت بذلات بعض الناس يبذلها=ماهيب لله ولاتبذل على اليمه
إيورطه بالعزيمه لين ياكلها=وتنكب البشت واصبح سارحن يمه
قال أعطني موجز الأخبار وازهلها=صاحبك صاحب يصر العلم في كمه
مايدري إنه ضلم نفسه وحملها=وضرّب مسمار حامي ماطلع دمه
واعماله اللي يقدمها يحصلها=في يوم ماينفعه خاله ولاعمه
****
يامير يارمز الشرف والكرامه=يافزعة المضيوم في ساعة الضيق
يامن رقا بالمجد قمة سنامه=فواز زيزوم العيال الطاليق
من لابتن يثنون دون الجهامه=ويفرقون جموع الاضداد تفريق
دولة هل العوجا وروس الزعامه=جمال التخوت اللي تشيل المعاليق
يلجي لهم من شان وقته وضامه=ولحقه من الايام بعض الملاحيق
أشكي لكم جفنن جزا عن منامه=واشكي لكم همن لجا بالصناديق
واشكي لكم حالن تدانا حطامه=هيمن عليه الهم مافيه تبريق
على عشيرن تلني في غرامه=تل الحرار ألمبهمات المسابيق
أسهر عليه الليل داجي ضلامه=وابدع عليه معوشرات الطواريق
واليا طرا شوفه ولذة كلامه=سوالفن تسلب قلوب العشاشيق
بتلت قايمتن علي القيامه=والا إني أسبح في بحورن غواريق
مثل المريض اللي طويلن سقامه=يغمى عليه بسكرت الموت ويفيق
هذا سبب من تلني في غرامه=تل الحرار ألمبهمات المسابيق
لاياعيون اللي جفل من تهامه=يسمع لرعيان الجحادر نتاغيق
عين الغزال اللي بذيك العدامه=ماله حلي(ن)مع جميع المخاليق
ألا الغزال بنظرته واغتنامه=والعين عين اللي بروس الشواهيق
عين العديم اللي براسه شهامه=أشقر عريض الصدر زين المفاهيق
عليه من دم الحباري علامه=من د برقآ طقها العصر بلحيق
تبا السلامه مار مامن سلامه=عنها السلامه بعد عسفان لطويق
تلحفت جنحانها مع مقامه=وحول عليها بين صيحه وتصفيق
قد علموه العام طرد الحمامه=ولاشافها ألا يابس الحلق والريق
هذا ومن يلحق محبن ملامه=تجري به الدنيا على غير توفيق
القصائد بصوت الشاعر والقاءه الفريد
اعنف خبر (رثاء في الملك فيصل)
سلام يادار الوفاء
سلام ياسلمـــــــان
حنا سعوديين
من سب داري
ليا صليت قالوا سعودي
الشجرة ال سعود
يانجد حبّك هو شرابي وزادي
بديت القيل
يالله تامرنا
الا يالله
ربعي عتيبه
رحلة مع الايام
قالوا تعلمت
اتمنى ان لايكون هناك اخطاء والمعذر في القصور
مودتي