[فهد النفيعي]

هذا واحد دلبحي من الخمسان اسمه (اذا ثبتت السالفه راح اذكر الا سماء با التفصيل) يكد على تكسي في الحج الاللي راح ركب معه احد الركاب عابر سبيل ومنا ومنا جت السوالف راحت السوالف قال ياخي انا ارتحت لك وابي اعلمك بشي قال الدلبحي وهو من الخمسان من اهل ام طليحه سم قال انا وانا ضغير ضايع من اهلي قبل 26 سنه واخذوني شايب وعجوز وربوني يم الاحساء ........لان جا عمري 14 ثم علموني ياولد ترانا مانب اهل لك دور اهلك وشلون قالوله هذا الصدق وانا اذكر يومني ضعت كان عمري 7 سنين في بر واذكر لي حرمتين وسماهن قال الدلبحي السواق عطني ارقامك انا خابر لي حرمه من ربعي مضيعتن ولدها في هاك السنه يني قبل 26 سنه قال هذا ابشر وهاك الا رقام وبعد كم يوم سير الدلبحي على الحرمه هذي في بيت اخوها وهو رجال معروف من الخمسان من الدلابحه ومنصب ولكن انشا الله لاثبتت القصه ذكرتلكم الا سماء
الزبده
علمه با العلم ونادى الحرمه وسلمت على ولد عمها وقالوا دق على الرجال خله يجي وزهمو على الرجال ونشدوه نشدوه قال انا رباني شايب وعجوز يم الاحساء ويوم جاء عمري حول الربع طعش علموني با السالفه وان الحين سني ولله الحمد مع ان الحاره اللي كنت فيها كلها شيعه قالت الحرمه بحضور اخوها وولد عمها نزل شررابك وعرفته بماريه في رجله وقالت انت فيك ماريه في بطنك قال ايه
والحرمه مغير تهلل وتكبر قالت والله انه ولدي
عاد نششدوه وش تذكر وش ماتذكر قال اذكر اني ضعت في بر اونا ورع ومعي حرمتين واساميهن فلانه فلانه
واحين ارسلو حمض نووي منه وحمض نووي منها على حساب الامير سلمان مدري سلطان لامريكا حتى يظهر بسرعه يبون يتاكدون اكثر
وهذي كل السالفه وانشاء الله يكون ولدهم صدق والله يقر به عين والدته بعد هال السنين كلها