[الأمــير]

ياسايـق الفنجـال للعـود عـدّه = اللي مـع الجـلاس كنّـه لحالـه
ان كان تعرف قيمة النـاس بـدّه = قدّام من يمـلا المجالـس جهالـه
وقـدّام مـن يستحقـره مايـودّه =وقدّام من يرفـى خمالـه ريالـه
هذا من اتلى اهل النظا والاشـدّه =اللي لهم في كل مركـاض قالـه
قلط عليك ظـروف وقتـه تحـدّه = الله لايجـزى الحسانـي عيالـه
مايملك اللا اللـي تشوفـه بيـدّه = اللي ليا مـال ركـزه وارتكالـه
وقته ونصف اهل اخر الوقت ضدّه =مشيبـه ميـل الزمـان وعدالـه
وطيّب ومرهقتـه حيـاة المكـدّه = ولايرهق الرّجال غيـر الشكالـه
وصبيت فنجالـك وطرفـك تلـدّه = للّي من امـوال المرابيـن مالـه
اللّي يحسب ان المراكـي مخـدّه = يميـل ويمـدّ القصـار الجلالـه
واليا هرج لو يقف فالريـع سـدّه = وبالفعل مافـال النشامـى بفالـه
وعن الصحن لاحطّ محدن يـردّه = تقل معه من كل حاظـر وكالـه
وليا وصل بطنه من الـزاد حـدّه =غسّـل يديـه وقـام يسبرنعالـه
والمشكلـه يلقـى رجـالٍ تعـدّه = قدم النشامى طايلـة كـل طالـه
وتنزلـه منـزال ماهـوب قـدّه = والبكر اله فنجـال والـلا بيالـه
وانته معزّب ولـك مـدّه وضـدّه = والحـق للّـي شايباتـن سبالـه
اللي قلط وظـروف وقتـه تحـدّه = ولاذاق من دلتـك غيـر الحثالـه