الله من قلبٍ سطابه عذابه = وركز سهومه فالضلوع المحاديب
مافيه هم الا على القلب جابه = وجمع هموم الكون من غير تحسيب
وتناهشن قلبي سواة الذيابه = وقلبي لهنه من خيار المعازيب
لاشك مايكتب على العبد صابه = مكتوب في لوحٍ يحفظ المكاتيب
يعمل عمل لابد يلقى الجزابه = يلقى الجزا مافيه شكه ولاريب
واللي يميز فالخطا من صوابه = ياخذ من الدنيا دروس وتجاريب
منلا التفت للمرجله في شبابه = ما تلتفت يمه ليا رشه الشيب
ومن لايثمن كلمته في جوابه = فرحو عليه مدورين العذاريب
ومن لايكمل لازمه من زهابه = يبلش ليا صكن عليه المغاليب
ومن لاحسب لليوم الاسود حسابه = تقطعت عنه العرا والمقاضيب
ومن يهاب الناس محدن يهابه = ومن لاحسب للعيب لايامن العيب
ومن شق ثوب الناس شقو ثيابه= ومن لا تعب للطيب ماحصل الطيب